Qazaqstan Respýblikasy Ádilet ministrligi Zańnama jáne quqyqtyq aqparat institýtynyń jetekshi ǵylymi qyzmetkeri, PhD doktory Erik Ahmetov azamattardyń Quryltai depýtattaryn sailaýǵa qatysýy memlekettiń turaqty damýy men memlekettik basqarý sapasyna tikelei áser etetinin aitty, dep habarlaidy Dalanews.
Onyń aitýynsha, Quryltai depýtattarynyń sailaýy zań shyǵarýshy biliktiń jańa bir palataly parlamentke kóshýin bildiredi. Sarapshynyń pikirinshe, Quryltai proportsionaldy partiialyq júie boiynsha jasaqtalyp, memlekettik sheshimder qabyldaý tetigin ózgertedi jáne saiasi partiialardyń jaýapkershiligin arttyrady.
Erik Ahmetov azamattardyń sailaýǵa belsendi qatysýy Quryltaidyń zańdylyǵyn kúsheitip, reformalardy júzege asyrýǵa berik negiz qalyptastyratynyn atap ótti.
«Azamattardyń Quryltai depýtattaryn sailaýǵa qatysýy memlekettiń turaqtylyǵy men damý sapasyn tikelei aiqyndaidy. Bul – qoǵamnyń eldi basqarýǵa yqpal etetin negizgi tetigi. Sailaýǵa qatysý deńgeiiniń joǵary bolýy sailanǵan Quryltaidyń qoǵamdyq qoldaýyn kúsheitip, reformalardy iske asyrýǵa berik mandat beredi», – dedi ol.
Sarapshynyń sózinshe, azamattar daýys berý arqyly kásibi ári bedeldi ókilderdi tańdaidy, bul óz kezeginde qabyldanatyn zańdar men memlekettik baǵdarlamalardyń sapasyna áser etedi. Sonymen qatar, sailaýǵa qatysý azamattardyń el bolashaǵyna degen jaýapkershiligin arttyryp, olardyń óz daýysy men ómir sapasynyń arasyndaǵy bailanysty tereńirek túsinýine múmkindik beredi.
Ahmetov jańa Quryltaidyń qurylýy zań shyǵarý úderisiniń tiimdiligin arttyryp, memlekettik basqarýdy jetildiretinin de aitty. Onyń pikirinshe, bir palataly parlamentke kóshý biýrokratiialyq kedergilerdi azaityp, zańdardy qabyldaý protsesin jedeldetýge jáne atqarýshy bilikke parlamenttik baqylaýdy kúsheitýge múmkindik beredi.
Sondai-aq ol jańa saiasi model memleket pen qoǵam arasyndaǵy ózara is-qimyldy jańa deńgeige kóteretinin jetkizdi. Onyń aitýynsha, «estitin memleket» tujyrymdamasy naqty quqyqtyq tetikter arqyly iske asyp, partiialar men Quryltai depýtattary tsifrlyq qabyldaýlar, óńirlik kezdesýler jáne ózge de bailanys arnalary arqyly azamattarmen turaqty jumys júrgizedi.
Sóz sońynda Erik Ahmetov jańa Quryltai jumysynyń nátijesin azamattar jaqyn ýaqytta sezine bastaitynyn aitty. Onyń pikirinshe, bul zańdardyń jedel qabyldanýyna, memlekettik organdardyń eseptiliginiń kúsheiýine, biýdjet qarajatynyń jumsalýyna baqylaýdyń ashyq bolýyna jáne qoǵamnyń memlekettik institýttarǵa degen seniminiń artýyna yqpal etedi.
