Qarjaýbai Nurymovtyń qaryndasy Perizat Nurymova advokat Dimash Qamataimen birge áleýmettik jeli arqyly málimdeme jasady. Keshe ǵana Aitbek Amangeldi Sherzat isinde Qarjaýbai Nurymov advokattardan bas tartqanyn habarlaǵan bolatyn, dep habarlaidy Dalanews.kz.
– Aitbektiń bergen suhbatyna bailanysty aitarymyz: otbasy advokattardan bas tartqan joq. Olar advokattardyń alty ai boiy atqarǵan eńbegine alǵys bildiredi. Alaida sońǵy kúnderi bolǵan jaǵdailarǵa bailanysty Aitbek bul iste ári qarai qatyspaýy kerek dep esepteimiz, – dedi Dimash Qamatai.
Perizat Nurymova da Aitbek Amangeldiniń suhbatyna qatysty óz pikirin bildirdi.
– Bul suhbattan keiin kóptegen suraqtar týyndady. Sol sebepti Qarjaýbaidyń ózi bergen senimhatyna súiene otyryp jaýap berýdi jón kórdik. Anyqtap aitqanda, Qarjaýbai qorǵaýshylardan bas tartqan joq. Bul máseleni kótergen – Aitbek myrzanyń ózi. Onyń sebebin ózi túsindire jatar. Qarjaýbai Aitbek myrzanyń adamdarǵa dóreki sóileýi men shamadan tys qatqyl áreketterine bailanysty oǵan eskertý jasaǵan bolatyn. Eger jaǵdai ýshyǵyp, ekeýi ortaq sheshimge kele almasa, qorǵaýshylarmen kelisimshartty buzatynyn jai whatsapp-yna jazǵan. Bul áńgimeni Aitbek myrza ne sebepti jariialap jibergenin biz de túsinbei otyrmyz. Bul suraqqa da ol ózi jaýap beredi dep oilaimyn, – dedi Perizat Nurymova.
Ekinshi másele – jańa qorǵaýshylar quramyna qatysty.
– Qazirgi qorǵaýshylar naqty bes adam dep eshkimge jariialaǵan joqpyn. Búgingi qorǵaýshylar burynǵy qurammen birge isti jalǵastyrsa jaqsy bolar edi. Saida Táýekelova, Maral hanym, Karina hanym jáne basqa da qorǵaýshylarǵa alǵysymyz sheksiz. Alty ai boiy osy ispen úzdiksiz ainalysý ońai emes. Biz qorǵaýshylardan bas tartqan joqpyz, – dedi Qarjaýbai Nurymovtyń qaryndasy.
Úshinshi másele – aqsha jinaý týraly.
– Aqsha jinaý jaily sóz qozǵalǵan eken. Iá, bastapqyda advokat taba almaǵan kezde qarajat jinalǵany ras. Bul úsh kúnge ǵana sozyldy. Advokat tapqan soń, qarajat jinaýdy toqtattyq. Aitbek myrza men jaily da jeke aityp ótken eken. Men bul qarajatty qazaqtyń “jylý jinaý” dástúrine sai jinadym. Bul týraly Saida Táýekelova da, Aitbek myrza da habardar boldy. Ózim de aldyn ala eskertken bolatynmyn, – dedi Perizat Nurymova.
