Қаржаубай Нұрымовтың қарындасы Перизат Нұрымова адвокат Димаш Қаматаймен бірге әлеуметтік желі арқылы мәлімдеме жасады. Кеше ғана Айтбек Амангелді Шерзат ісінде Қаржаубай Нұрымов адвокаттардан бас тартқанын хабарлаған болатын, деп хабарлайды Dalanews.kz.

– Айтбектің берген сұхбатына байланысты айтарымыз: отбасы адвокаттардан бас тартқан жоқ. Олар адвокаттардың алты ай бойы атқарған еңбегіне алғыс білдіреді. Алайда соңғы күндері болған жағдайларға байланысты Айтбек бұл істе әрі қарай қатыспауы керек деп есептейміз, – деді Димаш Қаматай.

Перизат Нұрымова да Айтбек Амангелдінің сұхбатына қатысты өз пікірін білдірді.

– Бұл сұхбаттан кейін көптеген сұрақтар туындады. Сол себепті Қаржаубайдың өзі берген сенімхатына сүйене отырып жауап беруді жөн көрдік. Анықтап айтқанда, Қаржаубай қорғаушылардан бас тартқан жоқ. Бұл мәселені көтерген – Айтбек мырзаның өзі. Оның себебін өзі түсіндіре жатар. Қаржаубай Айтбек мырзаның адамдарға дөрекі сөйлеуі мен шамадан тыс қатқыл әрекеттеріне байланысты оған ескерту жасаған болатын. Егер жағдай ушығып, екеуі ортақ шешімге келе алмаса, қорғаушылармен келісімшартты бұзатынын жай whatsapp-ына жазған. Бұл әңгімені Айтбек мырза не себепті жариялап жібергенін біз де түсінбей отырмыз. Бұл сұраққа да ол өзі жауап береді деп ойлаймын, – деді Перизат Нұрымова.

Екінші мәселе – жаңа қорғаушылар құрамына қатысты.

– Қазіргі қорғаушылар нақты бес адам деп ешкімге жариялаған жоқпын. Бүгінгі қорғаушылар бұрынғы құраммен бірге істі жалғастырса жақсы болар еді. Саида Тәуекелова, Марал ханым, Карина ханым және басқа да қорғаушыларға алғысымыз шексіз. Алты ай бойы осы іспен үздіксіз айналысу оңай емес. Біз қорғаушылардан бас тартқан жоқпыз, – деді Қаржаубай Нұрымовтың қарындасы.

Үшінші мәселе – ақша жинау туралы.

– Ақша жинау жайлы сөз қозғалған екен. Иә, бастапқыда адвокат таба алмаған кезде қаражат жиналғаны рас. Бұл үш күнге ғана созылды. Адвокат тапқан соң, қаражат жинауды тоқтаттық. Айтбек мырза мен жайлы да жеке айтып өткен екен. Мен бұл қаражатты қазақтың “жылу жинау” дәстүріне сай жинадым. Бұл туралы Саида Тәуекелова да, Айтбек мырза да хабардар болды. Өзім де алдын ала ескерткен болатынмын, – деді Перизат Нұрымова.