قارجاۋباي نۇرىموۆتىڭ قارىنداسى پەريزات نۇرىموۆا ادۆوكات ديماش قاماتايمەن بىرگە الەۋمەتتىك جەلى ارقىلى مالىمدەمە جاسادى. كەشە عانا ايتبەك امانگەلدى شەرزات ىسىندە قارجاۋباي نۇرىموۆ ادۆوكاتتاردان باس تارتقانىن حابارلاعان بولاتىن، دەپ حابارلايدى Dalanews.kz.
– ايتبەكتىڭ بەرگەن سۇحباتىنا بايلانىستى ايتارىمىز: وتباسى ادۆوكاتتاردان باس تارتقان جوق. ولار ادۆوكاتتاردىڭ التى اي بويى اتقارعان ەڭبەگىنە العىس بىلدىرەدى. الايدا سوڭعى كۇندەرى بولعان جاعدايلارعا بايلانىستى ايتبەك بۇل ىستە ءارى قاراي قاتىسپاۋى كەرەك دەپ ەسەپتەيمىز، – دەدى ديماش قاماتاي.
پەريزات نۇرىموۆا دا ايتبەك امانگەلدىنىڭ سۇحباتىنا قاتىستى ءوز پىكىرىن ءبىلدىردى.
– بۇل سۇحباتتان كەيىن كوپتەگەن سۇراقتار تۋىندادى. سول سەبەپتى قارجاۋبايدىڭ ءوزى بەرگەن سەنىمحاتىنا سۇيەنە وتىرىپ جاۋاپ بەرۋدى ءجون كوردىك. انىقتاپ ايتقاندا، قارجاۋباي قورعاۋشىلاردان باس تارتقان جوق. بۇل ماسەلەنى كوتەرگەن – ايتبەك مىرزانىڭ ءوزى. ونىڭ سەبەبىن ءوزى تۇسىندىرە جاتار. قارجاۋباي ايتبەك مىرزانىڭ ادامدارعا دورەكى سويلەۋى مەن شامادان تىس قاتقىل ارەكەتتەرىنە بايلانىستى وعان ەسكەرتۋ جاساعان بولاتىن. ەگەر جاعداي ۋشىعىپ، ەكەۋى ورتاق شەشىمگە كەلە الماسا، قورعاۋشىلارمەن كەلىسىمشارتتى بۇزاتىنىن جاي whatsapp-ىنا جازعان. بۇل اڭگىمەنى ايتبەك مىرزا نە سەبەپتى جاريالاپ جىبەرگەنىن ءبىز دە تۇسىنبەي وتىرمىز. بۇل سۇراققا دا ول ءوزى جاۋاپ بەرەدى دەپ ويلايمىن، – دەدى پەريزات نۇرىموۆا.
ەكىنشى ماسەلە – جاڭا قورعاۋشىلار قۇرامىنا قاتىستى.
– قازىرگى قورعاۋشىلار ناقتى بەس ادام دەپ ەشكىمگە جاريالاعان جوقپىن. بۇگىنگى قورعاۋشىلار بۇرىنعى قۇراممەن بىرگە ءىستى جالعاستىرسا جاقسى بولار ەدى. سايدا تاۋەكەلوۆا، مارال حانىم، كارينا حانىم جانە باسقا دا قورعاۋشىلارعا العىسىمىز شەكسىز. التى اي بويى وسى ىسپەن ۇزدىكسىز اينالىسۋ وڭاي ەمەس. ءبىز قورعاۋشىلاردان باس تارتقان جوقپىز، – دەدى قارجاۋباي نۇرىموۆتىڭ قارىنداسى.
ءۇشىنشى ماسەلە – اقشا جيناۋ تۋرالى.
– اقشا جيناۋ جايلى ءسوز قوزعالعان ەكەن. ءيا، باستاپقىدا ادۆوكات تابا الماعان كەزدە قاراجات جينالعانى راس. بۇل ءۇش كۇنگە عانا سوزىلدى. ادۆوكات تاپقان سوڭ، قاراجات جيناۋدى توقتاتتىق. ايتبەك مىرزا مەن جايلى دا جەكە ايتىپ وتكەن ەكەن. مەن بۇل قاراجاتتى قازاقتىڭ “جىلۋ جيناۋ” داستۇرىنە ساي جينادىم. بۇل تۋرالى سايدا تاۋەكەلوۆا دا، ايتبەك مىرزا دا حاباردار بولدى. ءوزىم دە الدىن الا ەسكەرتكەن بولاتىنمىن، – دەدى پەريزات نۇرىموۆا.
