"Olimpiadalar endi kanikýl kezinde ótkizilmeidi. Óitkeni, oǵan sabaqta óte belsendi, jaqsy oqityn oqýshylar qatysady. Biz olardy kanikýl ýaqytyndaǵy demalystan aiyrmaýymyz kerek, olar demalýy qajet. Sondyqtan, biyldan bastap olimpiadalardy basqa merzimde ótkizetin bolamyz", – dedi Ashat Aimaǵambetov.
Ministr respýblikalyq olimpiadaǵa qatysý úshin, oblystarǵa baratyn balalarǵa jaqsy jaǵdai jasalýy tiis ekenin aitty. Sondai-aq, joo basshylaryna oqýshylarmen kezdesý jumystaryn júrgizýdi tapsyrdy.
"Respýblikalyq olimpiadaǵa kem degende 1,5 myń daryndy, bilimdi bala qatysady. Daiyndyq barysyn bólek qarastyramyz, degenmen Qaraǵandy jáne Almaty oblystarynda balalardyń qaýipsizdigi, jatatyn jeri, tamaqtanýy boiynsha barlyq jaǵdai jasalsyn. Ekinshiden, ýniversitet basshylaryna tapsyrma: 1,5 myń oqýshy barady, ýniversitetter de olarmen jumys isteýi qajet. Jaz ailarynda ǵana emes, mundai jumys udaiy júrgizilýi kerek", – dedi Ashat Qanatuly.
Sóz sońynda ministr mektep bitirýshilerge ýniversitet tarapynan 50 grant bólgen TarMPÝ-dy ózge JOO-larǵa úlgi retinde atap ótti.
"Mysaly, Taraz memlekettik pedagogikalyq ýniversitetiniń rektory eriktilerge, daryndy balalarǵa 50 grant bóldi. Mine, osyny úlgi retinde aitýǵa bolady. Sondyqtan, kásiptik baǵyt-baǵdar berýge bei-jai qaramaý kerek", – dedi Ashat Qanatuly.
Esterińizge sala keteiik, osy jyldyń 6 qańtarynda QR BǴM Túrkistan oblysynyń bilim berý salasyndaǵy sapany qamtamasyz etý departamenti oqýshylar arasyndaǵy respýblikalyq olimpiadanyń oblystyq týryn ótkizý barysynda Túrkistan oblysynyń adami áleýetti damytý basqarmasynda jospardan tys tekserý júrgizdi. Nátijesinde birqatar óreskel buzýshylyq anyqtaldy.
Osyǵan orai, Ashat Aimaǵambetov olimpiada, ǵylymi joba baiqaýlary ádil, taza ótýi kerektigin basa aitty.
