"وليمپيادالار ەندى كانيكۋل كەزىندە وتكىزىلمەيدى. ويتكەنى، وعان ساباقتا وتە بەلسەندى، جاقسى وقيتىن وقۋشىلار قاتىسادى. ءبىز ولاردى كانيكۋل ۋاقىتىنداعى دەمالىستان ايىرماۋىمىز كەرەك، ولار دەمالۋى قاجەت. سوندىقتان، بيىلدان باستاپ وليمپيادالاردى باسقا مەرزىمدە وتكىزەتىن بولامىز"، – دەدى اسحات ايماعامبەتوۆ.
مينيستر رەسپۋبليكالىق وليمپياداعا قاتىسۋ ءۇشىن، وبلىستارعا باراتىن بالالارعا جاقسى جاعداي جاسالۋى ءتيىس ەكەنىن ايتتى. سونداي-اق، جوو باسشىلارىنا وقۋشىلارمەن كەزدەسۋ جۇمىستارىن جۇرگىزۋدى تاپسىردى.
"رەسپۋبليكالىق وليمپياداعا كەم دەگەندە 1،5 مىڭ دارىندى، ءبىلىمدى بالا قاتىسادى. دايىندىق بارىسىن بولەك قاراستىرامىز، دەگەنمەن قاراعاندى جانە الماتى وبلىستارىندا بالالاردىڭ قاۋىپسىزدىگى، جاتاتىن جەرى، تاماقتانۋى بويىنشا بارلىق جاعداي جاسالسىن. ەكىنشىدەن، ۋنيۆەرسيتەت باسشىلارىنا تاپسىرما: 1،5 مىڭ وقۋشى بارادى، ۋنيۆەرسيتەتتەر دە ولارمەن جۇمىس ىستەۋى قاجەت. جاز ايلارىندا عانا ەمەس، مۇنداي جۇمىس ۇدايى جۇرگىزىلۋى كەرەك"، – دەدى اسحات قانات ۇلى.
ءسوز سوڭىندا مينيستر مەكتەپ بىتىرۋشىلەرگە ۋنيۆەرسيتەت تاراپىنان 50 گرانت بولگەن تارمپۋ-دى وزگە جوو-لارعا ۇلگى رەتىندە اتاپ ءوتتى.
"مىسالى، تاراز مەملەكەتتىك پەداگوگيكالىق ۋنيۆەرسيتەتىنىڭ رەكتورى ەرىكتىلەرگە، دارىندى بالالارعا 50 گرانت ءبولدى. مىنە، وسىنى ۇلگى رەتىندە ايتۋعا بولادى. سوندىقتان، كاسىپتىك باعىت-باعدار بەرۋگە بەي-جاي قاراماۋ كەرەك"، – دەدى اسحات قانات ۇلى.
ەستەرىڭىزگە سالا كەتەيىك، وسى جىلدىڭ 6 قاڭتارىندا ق ر بعم تۇركىستان وبلىسىنىڭ ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتى وقۋشىلار اراسىنداعى رەسپۋبليكالىق وليمپيادانىڭ وبلىستىق تۋرىن وتكىزۋ بارىسىندا تۇركىستان وبلىسىنىڭ ادامي الەۋەتتى دامىتۋ باسقارماسىندا جوسپاردان تىس تەكسەرۋ جۇرگىزدى. ناتيجەسىندە ءبىرقاتار ورەسكەل بۇزۋشىلىق انىقتالدى.
وسىعان وراي، اسحات ايماعامبەتوۆ وليمپيادا، عىلىمي جوبا بايقاۋلارى ءادىل، تازا ءوتۋى كەرەكتىگىن باسا ايتتى.
