Árine, ne nárseniń de kelesi jaǵy bolady. Kórshi halyq erleriniń bir túnde shekara asyp kelýi beker emes, bastaryna qiynshylyq túskeni anyq. Bizdiń de basymyzǵa erteńgi kúni ne kún týatynyn bilmeimiz ǵoi, kórshi elmen birlikte bolǵan durys.
Sondyqtan olardy shetke ysyrmaǵanymyz abzal. Osy ýaqytqa deiin talai ózge ultty qol astymyzǵa alyp, qushaǵymyzǵa syiǵyzdyq, eshbirin shetke teppedik, sonyń arqasynda tatý-tátti tirshilik keshti. Buryn da, qazir de solai bolǵan.
Bul tusta arnaiy mekemeler óz jaýapkershiligin umytpaǵany jón. Qaýipsizdik sharalaryn qolǵa alyp, kelip jatqan azamattardy muqiiat tekserip, tizimin jasasa jetkilikti. Sebebi olardyń da, bizdiń azamattarymyzdyń da qaýipsizdigi asa mańyzdy.
Reseilikterdiń 90 kún boiy elimizde emin-erkin júrýine zańdy múmkindigi bar. Osyndai qiyn kezeńde bastaryna túsken aýyrtpashylyqtan sál de bolsa arylý úshin shekaramyzǵa qadam basty, jetiskennen júrgen joq. Sol sebepti sanaly, órkenietti el retinde ýaqytsha kelgen reseilikterge qamqor bolǵanymyz jón.
Syilastyǵymyzdy kórgen olardyń aldynda qazaq halqynyń abyroiy asqaqtap, tektiligimiz ben qadir-qasietimizdi uǵynary sózsiz. Tutastyq pen beibitshilik osyndai qysyltaiań kezdegi márttikten, parasattylyqtan bastaý alady. Asyl qasietterimizdi joǵaltpaǵanymyz durys.
