ەڭ الدىمەن، ءبىز الەم ەلدەرىنىڭ كوشىنەن قالماعان وركەنيەتتى ەل ەكەنىمىزدى ەستەن شىعارماۋ قاجەت. بىرىككەن ۇلتتار ۇيىمىنا مۇشە مەملەكەت رەتىندە، جەرىمىزگە ۋاقىتشا كەلىپ جاتقان رەسەيلىكتەردى بوسقىن مارتەبەسىندە قابىلداپ، قوناقجايلىلىق كورسەتكەنىمىز ءجون.

ارينە، نە نارسەنىڭ دە كەلەسى جاعى بولادى. كورشى حالىق ەرلەرىنىڭ ءبىر تۇندە شەكارا اسىپ كەلۋى بەكەر ەمەس، باستارىنا قيىنشىلىق تۇسكەنى انىق. ءبىزدىڭ دە باسىمىزعا ەرتەڭگى كۇنى نە كۇن تۋاتىنىن بىلمەيمىز عوي، كورشى ەلمەن بىرلىكتە بولعان دۇرىس.

سوندىقتان ولاردى شەتكە ىسىرماعانىمىز ابزال. وسى ۋاقىتقا دەيىن تالاي وزگە ۇلتتى قول استىمىزعا الىپ، قۇشاعىمىزعا سىيعىزدىق، ەشبىرىن شەتكە تەپپەدىك، سونىڭ ارقاسىندا ءتاتۋ-تاتتى تىرشىلىك كەشتى. بۇرىن دا، ءقازىر دە سولاي بولعان.

بۇل تۇستا ارنايى مەكەمەلەر ءوز جاۋاپكەرشىلىگىن ۇمىتپاعانى ءجون. قاۋىپسىزدىك شارالارىن قولعا الىپ، كەلىپ جاتقان ازاماتتاردى مۇقيات تەكسەرىپ، ءتىزىمىن جاساسا جەتكىلىكتى. سەبەبى ولاردىڭ دا، ءبىزدىڭ ازاماتتارىمىزدىڭ دا قاۋىپسىزدىگى اسا ماڭىزدى.

رەسەيلىكتەردىڭ 90 كۇن بويى ەلىمىزدە ەمىن-ەركىن جۇرۋىنە زاڭدى مۇمكىندىگى بار. وسىنداي قيىن كەزەڭدە باستارىنا تۇسكەن اۋىرتپاشىلىقتان ءسال دە بولسا ارىلۋ ءۇشىن شەكارامىزعا قادام باستى، جەتىسكەننەن جۇرگەن جوق. سول سەبەپتى سانالى، وركەنيەتتى ەل رەتىندە ۋاقىتشا كەلگەن رەسەيلىكتەرگە قامقور بولعانىمىز ءجون.

سىيلاستىعىمىزدى كورگەن ولاردىڭ الدىندا قازاق حالقىنىڭ ابىرويى اسقاقتاپ، تەكتىلىگىمىز بەن قادىر-قاسيەتىمىزدى ۇعىنارى ءسوزسىز. تۇتاستىق پەن بەيبىتشىلىك وسىنداي قىسىلتاياڭ كەزدەگى مارتتىكتەن، پاراساتتىلىقتان باستاۋ الادى. اسىل قاسيەتتەرىمىزدى جوعالتپاعانىمىز دۇرىس.