Memleket basshysy Qasym-Jomart Toqaevtyń tapsyrmalaryn oryndaý aiasynda Premer-ministrdiń orynbasary, mádeniet jáne aqparat ministri Aida Balaeva 2030 jylǵa deiingi Kóshi-qon saiasaty tujyrymdamasynyń negizgi baǵyttaryn túsindirdi, dep habarlaidy Dalanews.kz.
Ministrdiń aitýynsha, kóshi-qon saiasaty búginde ekonomikadaǵy, qoǵamdaǵy jáne jahandyq úderisterdegi ózgeristerdiń aiqyn kórsetkishine ainalǵan. Osyǵan bailanysty Qazaqstan kóshi-qon júiesin zaman talabyna sai jańartyp, ony ashyq ári aiqyn etýge basymdyq berip otyr.
Aida Balaeva 2025 jylǵy jeltoqsanda Úkimet 2030 jylǵa deiingi kóshi-qon saiasatynyń tujyrymdamasyn qabyldaǵanyn atap ótti. Qujatta ekonomikanyń qajettiligi, azamattardyń múddesi jáne ulttyq qaýipsizdik máseleleri keshendi túrde qarastyrylǵan.
Onyń aitýynsha, Qazaqstan sheteldik jumys kúshin tek naqty kadr tapshylyǵy bar salalarǵa ǵana tartady. Kóshi-qon baǵyttary óńirlerdiń jáne naqty jobalardyń suranysyna qarai aiqyndalady. Bul rette «Zań jáne Tártip» qaǵidaty basty nazarda bolady.
Ministr kóshi-qon talaptaryn buzǵan tulǵalar jaýapkershilikten jaltara almaitynyn atap ótti. Bul talaptar migranttarǵa da, jumys berýshilerge de birdei qoldanylady. Qaýipsizdik elge kirýden bastap, elden shyǵýǵa deiin tolyq qamtamasyz etiledi.
2026 jylǵy qańtardan bastap jańa tártip engiziledi. Oǵan sáikes, shetel azamattary, sonyń ishinde etnikalyq qazaqtar aldyn ala irikteýden ótedi. Irikteý memlekettik tildi bilý testin, tsifrlyq saýalnamany, ýákiletti organdardyń tekserýin jáne áńgimelesýdi qamtidy.
Qandastar úshin memlekettik qoldaý bólek tártippen júzege asady. Memlekettik jeńildikterdi alý úshin olar qandas mártebesin rásimdep, eńbek kúshi tapshy óńirlerge qonystanýy tiis. Bul óńirler qatarynda Aqmola, Abai, Qostanai, Pavlodar, Atyraý, Batys, Shyǵys jáne Soltústik Qazaqstan oblystary bar.
Ministrdiń sózinshe, óńirlik kvotaǵa engen qandastar kóship kelgen kezde bes jylǵa áleýmettik kelisimshart jasaidy. Memleket kóshýge, turǵyn úi men jumysqa ornalasýǵa qoldaý kórsetedi. Alaida otbasy bes jyl ótpei basqa óńirge kóshken jaǵdaida alǵan kómekti qaitarýǵa mindetti.
Sonymen qatar memlekettik qoldaýsyz, jalpy tártippen turaqty turýǵa ruqsat alý múmkindigi de saqtalady. Bul jaǵdaida óńirdi azamattar óz qalaýynsha tańdai alady.
Aida Balaevanyń aitýynsha, jańa kóshi-qon saiasaty kezeń-kezeńimen engiziledi. Bul úderiste qoǵamnyń, biznestiń jáne óńirlerdiń pikiri eskeriledi. Zańdy qurmetteitin azamattarǵa basymdyq beriledi, al tsifrlyq quraldar zańsyz áreketter men jalǵan qujattardyń aldyn alýǵa múmkindik beredi.
Ministr kóshi-qon saiasaty zańdy, qaýipsiz jáne tolyq baqylaýda bolýy tiis ekenin atap ótti.
