مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا پرەمەر-مينيستردٸڭ ورىنباسارى, مەدەنيەت جەنە اقپارات مينيسترٸ ايدا بالاەۆا 2030 جىلعا دەيٸنگٸ كٶشٸ-قون ساياساتى تۇجىرىمداماسىنىڭ نەگٸزگٸ باعىتتارىن تٷسٸندٸردٸ, دەپ حابارلايدى Dalanews.kz.
مينيستردٸڭ ايتۋىنشا, كٶشٸ-قون ساياساتى بٷگٸندە ەكونوميكاداعى, قوعامداعى جەنە جاھاندىق ٷدەرٸستەردەگٸ ٶزگەرٸستەردٸڭ ايقىن كٶرسەتكٸشٸنە اينالعان. وسىعان بايلانىستى قازاقستان كٶشٸ-قون جٷيەسٸن زامان تالابىنا ساي جاڭارتىپ, ونى اشىق ەرٸ ايقىن ەتۋگە باسىمدىق بەرٸپ وتىر.
ايدا بالاەۆا 2025 جىلعى جەلتوقساندا ٷكٸمەت 2030 جىلعا دەيٸنگٸ كٶشٸ-قون ساياساتىنىڭ تۇجىرىمداماسىن قابىلداعانىن اتاپ ٶتتٸ. قۇجاتتا ەكونوميكانىڭ قاجەتتٸلٸگٸ, ازاماتتاردىڭ مٷددەسٸ جەنە ۇلتتىق قاۋٸپسٸزدٸك مەسەلەلەرٸ كەشەندٸ تٷردە قاراستىرىلعان.
ونىڭ ايتۋىنشا, قازاقستان شەتەلدٸك جۇمىس كٷشٸن تەك ناقتى كادر تاپشىلىعى بار سالالارعا عانا تارتادى. كٶشٸ-قون باعىتتارى ٶڭٸرلەردٸڭ جەنە ناقتى جوبالاردىڭ سۇرانىسىنا قاراي ايقىندالادى. بۇل رەتتە «زاڭ جەنە تەرتٸپ» قاعيداتى باستى نازاردا بولادى.
مينيستر كٶشٸ-قون تالاپتارىن بۇزعان تۇلعالار جاۋاپكەرشٸلٸكتەن جالتارا المايتىنىن اتاپ ٶتتٸ. بۇل تالاپتار ميگرانتتارعا دا, جۇمىس بەرۋشٸلەرگە دە بٸردەي قولدانىلادى. قاۋٸپسٸزدٸك ەلگە كٸرۋدەن باستاپ, ەلدەن شىعۋعا دەيٸن تولىق قامتاماسىز ەتٸلەدٸ.
2026 جىلعى قاڭتاردان باستاپ جاڭا تەرتٸپ ەنگٸزٸلەدٸ. وعان سەيكەس, شەتەل ازاماتتارى, سونىڭ ٸشٸندە ەتنيكالىق قازاقتار الدىن الا ٸرٸكتەۋدەن ٶتەدٸ. ٸرٸكتەۋ مەملەكەتتٸك تٸلدٸ بٸلۋ تەستٸن, تسيفرلىق ساۋالنامانى, ۋەكٸلەتتٸ ورگانداردىڭ تەكسەرۋٸن جەنە ەڭگٸمەلەسۋدٸ قامتيدى.
قانداستار ٷشٸن مەملەكەتتٸك قولداۋ بٶلەك تەرتٸپپەن جٷزەگە اسادى. مەملەكەتتٸك جەڭٸلدٸكتەردٸ الۋ ٷشٸن ولار قانداس مەرتەبەسٸن رەسٸمدەپ, ەڭبەك كٷشٸ تاپشى ٶڭٸرلەرگە قونىستانۋى تيٸس. بۇل ٶڭٸرلەر قاتارىندا اقمولا, اباي, قوستاناي, پاۆلودار, اتىراۋ, باتىس, شىعىس جەنە سولتٷستٸك قازاقستان وبلىستارى بار.
مينيستردٸڭ سٶزٸنشە, ٶڭٸرلٸك كۆوتاعا ەنگەن قانداستار كٶشٸپ كەلگەن كەزدە بەس جىلعا ەلەۋمەتتٸك كەلٸسٸمشارت جاسايدى. مەملەكەت كٶشۋگە, تۇرعىن ٷي مەن جۇمىسقا ورنالاسۋعا قولداۋ كٶرسەتەدٸ. الايدا وتباسى بەس جىل ٶتپەي باسقا ٶڭٸرگە كٶشكەن جاعدايدا العان كٶمەكتٸ قايتارۋعا مٸندەتتٸ.
سونىمەن قاتار مەملەكەتتٸك قولداۋسىز, جالپى تەرتٸپپەن تۇراقتى تۇرۋعا رۇقسات الۋ مٷمكٸندٸگٸ دە ساقتالادى. بۇل جاعدايدا ٶڭٸردٸ ازاماتتار ٶز قالاۋىنشا تاڭداي الادى.
ايدا بالاەۆانىڭ ايتۋىنشا, جاڭا كٶشٸ-قون ساياساتى كەزەڭ-كەزەڭٸمەن ەنگٸزٸلەدٸ. بۇل ٷدەرٸستە قوعامنىڭ, بيزنەستٸڭ جەنە ٶڭٸرلەردٸڭ پٸكٸرٸ ەسكەرٸلەدٸ. زاڭدى قۇرمەتتەيتٸن ازاماتتارعا باسىمدىق بەرٸلەدٸ, ال تسيفرلىق قۇرالدار زاڭسىز ەرەكەتتەر مەن جالعان قۇجاتتاردىڭ الدىن الۋعا مٷمكٸندٸك بەرەدٸ.
مينيستر كٶشٸ-قون ساياساتى زاڭدى, قاۋٸپسٸز جەنە تولىق باقىلاۋدا بولۋى تيٸس ەكەنٸن اتاپ ٶتتٸ.
