Abai oblysyndaǵy Aiagóz garnizonynda merzimdi áskeri qyzmette bolǵan 18 jastaǵy Salamat Sábitov qaitys boldy. Qorǵanys ministrligi sarbazdyń kóz jumǵanyn rastap, keiinirek túsinikteme berýge ýáde etti, dep habarlaidy Dalanews.kz.
Marqumnyń týystary Stan.kz portalyna mán-jaidy baiandady. Olardyń aitýynsha, Salamat densaýlyǵyna bailanysty áskerge jaramsyz dep tanylǵanymen, ol biyl naýryz aiynda Soltústik Qazaqstan oblysynan shaqyrtylyp, tank bólimshesine jiberilgen. Olar Sábitovtyń omyrtqasynda jáne kórý qabiletinde aqaýy bolǵanyn, bul týraly meditsinalyq anyqtama da bar ekenin málimdedi.
“Salamat úsh apta ǵana áskerde boldy. Ant qabyldaýǵa da úlgermedi. Bir apta aýrýhanada jatty. Jaǵdaiy nasharlaǵanda ǵana ata-anasyna habar berdi”, – deidi týystary.
Aldyn ala málimet boiynsha, ólimniń sebebi – meningitten týyndaǵan midyń irińdi qabynýy. Qazir Salamat Sábitovtyń ata-anasy Aiagózge kelgen. Sonymen qatar, ony áskerge shaqyrǵan Soltústik Qazaqstan oblysyndaǵy shaqyrý komissiiasy ishki qyzmettik tekseris bastaǵany habarlandy.
