اباي وبلىسىنداعى اياگوز گارنيزونىندا مەرزىمدى اسكەري قىزمەتتە بولعان 18 جاستاعى سالامات ءسابيتوۆ قايتىس بولدى. قورعانىس مينيسترلىگى ساربازدىڭ كوز جۇمعانىن راستاپ، كەيىنىرەك تۇسىنىكتەمە بەرۋگە ۋادە ەتتى، دەپ حابارلايدى Dalanews.kz.
مارقۇمنىڭ تۋىستارى Stan.kz پورتالىنا ءمان-جايدى باياندادى. ولاردىڭ ايتۋىنشا، سالامات دەنساۋلىعىنا بايلانىستى اسكەرگە جارامسىز دەپ تانىلعانىمەن، ول بيىل ناۋرىز ايىندا سولتۇستىك قازاقستان وبلىسىنان شاقىرتىلىپ، تانك بولىمشەسىنە جىبەرىلگەن. ولار ءسابيتوۆتىڭ ومىرتقاسىندا جانە كورۋ قابىلەتىندە اقاۋى بولعانىن، بۇل تۋرالى مەديسينالىق انىقتاما دا بار ەكەنىن مالىمدەدى.
“سالامات ءۇش اپتا عانا اسكەردە بولدى. انت قابىلداۋعا دا ۇلگەرمەدى. ءبىر اپتا اۋرۋحانادا جاتتى. جاعدايى ناشارلاعاندا عانا اتا-اناسىنا حابار بەردى”، – دەيدى تۋىستارى.
الدىن الا مالىمەت بويىنشا، ءولىمنىڭ سەبەبى – مەنينگيتتەن تۋىنداعان ميدىڭ ءىرىڭدى قابىنۋى. ءقازىر سالامات ءسابيتوۆتىڭ اتا-اناسى اياگوزگە كەلگەن. سونىمەن قاتار، ونى اسكەرگە شاقىرعان سولتۇستىك قازاقستان وبلىسىنداعى شاقىرۋ كوميسسياسى ىشكى قىزمەتتىك تەكسەرىس باستاعانى حابارلاندى.
