Kúni keshe Qazaqstanda Alem Crypto Fund kriptoqory óz jumysyn bastady. Qor Jasandy intellekt jáne tsifrlyq damý ministrliginiń bastamasymen qurylyp, Qazaqstan Venture Group basqarýyna berildi jáne Astana halyqaralyq qarjy ortalyǵynyń (AHQO) ekojúiesinde tirkeldi. Muny Memleket basshysy tapsyrǵan memlekettik kriptoqor retinde qabyldaǵan keibir sarapshy bul rette kúdik pen kúmánge jol berip, tosylyp qalǵandaryn da jazǵan edik. Sóitsek, biz sóz etken kriptoqor memlekettik bolmai shyǵyp, bul arada shatasý oryn alǵany belgili boldy. Bul týraly búgingi Ulttyq Banktiń málimdemesinde aityldy, dep habarlaidy Dalanews.kz.
Qazaqstan Ulttyq Banki "Astana" halyqaralyq qarjy ortalyǵynyń bazasynda kriptoqor qurýǵa qatysty kóptep túsip jatqan saýaldarǵa bailanysty mynany habarlaidy:
"BAQ-ta atalǵan Alem Crypto Fund kriptoqory QR Jasandy intellekt jáne tsifrlyq damý ministrliginiń qoldaýymen qurylǵanymen, memlekettik qorǵa jatpaidy. Mundai kriptoqorlar naryqtyq iýrisdiktsiiada, sonyń ishinde "Astana" halyqaralyq qarjy ortalyǵy alańynda qurylýy múmkin, alaida olarǵa memlekettik rezervterdi basqarýǵa quqyq berilmeidi".
Ulttyq Bank strategiialyq kriptorezervti jinaqtaý úshin Memlekettik tsifrlyq aktivter qoryn (MTsAQ) qurý boiynsha kezeń-kezeńimen atqarylatyn jumystardy júrgizip jatqanyn naqtylaidy.
"Qazir MTsAQ Kontseptsiiasy ázirlenip qoidy, ol qordyń negizgi maqsaty men mindetterin jáne ony qurý men basqarý tetikterin aiqyndaidy. Sonymen qatar operatsiialyq jáne tehnikalyq infraqurylym qurý jumystary qatar júrip jatyr. Qordy "Qazaqstan Ulttyq Bankiniń Ulttyq investitsiialyq korporatsiiasy" AQ basqarady. Bul uiymnyń balama investitsiia quraldaryn basqarý salasynda ózindik tájiribesi bar. Daiyndyq jumystary 2025 sońyna deiin aiaqtalyp, memlekettik tsifrlyq aktivter qory 2026 jyldyń basynda iske qosylady dep josparlanyp otyr", delingen Ulttyq Bank túsiniktemesinde.
Buǵan deiin jańadan qurylǵan alǵashqy tsifrlyq valiýta qoryna qatysty ekonomist Eldar Shamsýtdinov pen Rýslan Sultanovtyń pikirin jariialaǵan bolatynbyz.
