Tergeýshiler sheneýnik karantın kezinde qalada júrip-turýǵa múmkindik beretin ruqsat qaǵazyn saýdalaǵan dep paıymdap otyr. Muny SHQO-nyń Sybaılas jemqorlyqqa qarsy basqarmasy málim etti.
"Ókinishke oraı bul salada zańbuzýshylyqqa jol berildi. Semeı qalasy Kásipkerlik bóliminiń bas mamany ustaldy. Ol qalada kedergisiz qatynaýǵa múmkindik beretin 5 birdeı ruqsat qaǵazyn 25 myń teńgege satqan", – dep habarlady vedomstvo ókili.
Para aldy aıyptalǵan sheneýnik kinásin moıyndady, tergeý amaldary bastaldy.
Eske sala ketelik budan buryn SHQO ákimi Danıal Ahmetov ruqsat qaǵazdaryn alýda zańsyzdyqqa jol berilgenin aıtqan.
"Ruqsat qaǵazdaryn alǵan keıbir kásipkerler ony maqsatsyz paıdalanyp júr. Tipti, keı ruqsat qaǵazdardyń satylǵany týraly naqty aqparat bar”, – degen edi oblys ákimi. Ahmetov osyǵan oraı Sybaılas jemqorlyqqa qarsy is-qımyl Departamenti tekserý júrgizýde ekenin habarlaǵan.
“Olar ruqsat qaǵazdaryn berýde qyzmetin asyra paıdalanǵan memlekettik qyzmetshilerdiń zańsyz is-áreketteriniń jolyn kesip, tıisti sharalardy qabyldaıdy”, – deıdi ákim.
Aıta ketelik SHQO koronavırýs tirkelgen óńirler arasynda eń tómengi kórsetkishke ıe aımaqtyń biri. Oblysta qaýipti ınfeksıa juqtyrǵan 8 adam anyqtalǵan.
Búginnen bastap SHQO aýmaǵynda oblystyq jedel shtabtyń sheshimi boıynsha karantın rejımi engiziledi. Eldegi TJ kezeńi aıaqtalǵanǵa deıin oblysqa kirý jáne shyǵý shekteledi.
