– Sizdiń dúkenińizdiń ereksheligi men tartymdylyǵyn sıpattap berseńiz. Tutynýshylar nege sizdiń dúkendi tańdaý kerek? Kompanıanyń mısıasy qandaı?
Basty ereksheligimiz – Qazaqstannyń kólderi men sý qoımalarynda ustalynǵan balyqty deldalsyz jetkizý. Sý jaǵasynan shyqqan balyq 12 saǵat ishinde dúkende bolady. Sonymen qatar, bizdiń dúkende Reseı jáne ózge memleketterdiń de muzdatylǵan balyq ónimderi bar. Biz árqashan balyqshylarmen tikeleı jumys isteımiz, sondyqtan tutynýshylarǵa eń qoljetimdi baǵamen usynamyz.
Bizdiń mısıamyz – elimizdiń árbir otbasyn salaýatty jáne paıdaly balyq ónimimen qamtamasyz etý.
– Bul jumystyń siz sıaqty menshik ıesine tartymdylyǵy qandaı? Osy salada qansha ýaqyt jumys atqaryp kelesiz? Bári qalaı bastaldy?
– Bul salada júrgenime 18 jyldaı boldy. Biz Almatyǵa jubaıym ekeýimiz 20 jyl buryn keldik. Balalarymyz sol kezde ata-anamnyń qolynda qaldy. Bastapqyda Almatyǵa kelgenimizde jumys tappaı qatty qınaldyq. Sodan keıin basty kópshilik sıaqty mende bazarǵa bardym. Saýda salasyna júgindim. Kartop, jemis-jıdekter satyp ta kórdik. Odan aıtarlyqtaı tabys tappaǵannan keıin, ár nárseni baıqap, surap izdeniste júrdim. Solaı surastyra kele balyq óniminiń halyqqa paıdaly jáne jaqsy kóretin ónim ekenin túsindim. Sol kezdegi saýda salasyndaǵy júrgen synyptasymnyń aıtqan sózi meni qanattandyrǵany áli esimde: «Danıar, sen bizde óte jaqsy oqyp ediń ǵoı, bizdiń qoldan kelgen tirlik seniń de qolyńnan keletinine men senimdimin» deıtin. Osylaı sheshim qabyldandy.
– Siz tutynýshylaryńyzdy qalaı sıpattaısyz? Sizder kimge qyzmet kórsetesizder?
– Biz ár tutynýshyǵa qýanyshtymyz. Onyń ishinde – zeınetkerler, otbasylyq adamdar, iri meıramhana ıeleri jáne de balyq ónimin jaqsy kóretin jandar. Biz úshin ár otbasyn balǵyn jáne paıdaly ónimdermen qamtamyz etýdiń mańyzy zor.
– Sizdiń komanda úshin eń mańyzdy qundylyqtar?
– Adaldyq – árbir tutynýshyǵa adal jáne sapaly turǵyda qyzmet atqaram. Otbasylyq – bizdiń komanda, uıymshyl úlken otbasy. Biz árqashan adamdarǵa balyq ónimderinen taǵam daıyndaý boıynsha tıisti keńes berýge razymyz. Densaýlyq – birinshi baılyq ekenin túsinemiz, osyǵan oraı adam densaýlyǵyna paıdaly jáne kajetti ónimdi eń qoljetimdi baǵamen usynamyz. Kásibılik – biz aınalysqan qyzmetimizdi jaqsy kóremiz. Bizdiń komandada árqaısysy óziniń jumysyna qyzyǵýshylyq tanytatyn naǵyz kásipqoılar. Ynta jáne izetpen berilip jasalǵan jumys satýshydan bastalyp balyq bólýshige deıin dúkende ahýalǵa yqpal etedi. Jalpy iske ortaq úles – Alfısh dúkeninde barlyǵy qol jetimdi baǵalar. Qosymsha qyzmet retinde – balǵyn balyqtyń ár túrlerine 10 paıyzǵa deıin zeınetkerlerge arnaıy jeńildik. Komandamyzdyń umtylysy osy baǵytta. Dál osy qaǵıda boıynsha bizdiń ónim berýshiler de jumys atqarady. Óıtkeni, bul – bizdiń ortaq maqsatymyz. Eger memleket halyqqa áleýmettik kómekter beretin bolsa, nege shaǵyn kásipkerler berýi múmkin emes? Meniń oıymsha, bul ábden múmkin.
– Kompanıanyń qandaı maqsattary bar?
– Álemdik naryqqa sapaly qazaqstandyq ónimdi shyǵarý. Qazir bul turǵyda kóp jobalar daıyndyq ústinde. Bul jobamyz halyqtyń kóńilinen shyǵyp jatsa, Qazaqstannyń basqa da qalalarynda da osyndaı dúkender ashsaq degen oıymyz bar. Sondaı-aq, qazirgi ýaqytta kóterme satyp alýshylarǵa jáne meıramhanalarǵa balyqty qolaıly baǵamen tartýdamyz. Ónimderdi tegin tıisti jerge arnaıy kólikpen jetkize alamyz. Sizdiń qalaýyńyz boıynsha, ónimdi fıle, týshka, nemese steık túrinde alýǵa bolady.
– Qandaı áleýmettik belsendilik (qaıyrymdylyq) ispen aınalysasyz?
– Balalar úıine, rýhanı ortalyǵyna kómek kórsetýdemiz jáne de qazirgi tanda zeınetkerlerge arnaıy baǵamen balyq ónimderi satylýda.
Aınur Nurlanqyzy
