Qazaqstanda memleket menshigine qaitarylǵan aktivterdi kez kelgen azamat aýktsion arqyly satyp ala alady. Bul týraly "Qarjylyq saýat" telegram arnasynyń saýalyna "Qaitarylǵan aktivterdi basqarý kompaniiasynyń" baspasóz qyzmeti málim etti, dep habarlaidy Dalanews.kz.
Derekkóz taratqan aqparatqa súiensek, kompaniia - QR Úkimeti jalǵyz quryltaishysy bolyp tabylatyn kommertsiialyq uiym. Ol memleketke zańdy túrde qaitarylǵan jyljymaly jáne jyljymaityn múlikti qabyldap, keiin aýktsion arqyly satady. Satýdan túsken qarjy Arnaýly memlekettik qorǵa aýdarylyp, áleýmettik jáne infraqurylymdyq jobalarǵa jumsalady.
Aýktsion qaida ótedi?
Saýda-sattyq e-qazyna.kz memlekettik elektrondyq platformasynda júrgiziledi. Qolynda elektrondyq tsifrlyq qoltańbasy (ETsQ) bar kez kelgen azamat qatysa alady. Ol úshin saitta tirkelip, jeke derekterin (aty-jóni, JSN, bank jáne bailanys málimetteri) engizý qajet.
Kepildik jarna qansha?
Aýktsionǵa qatysý úshin kepildik jarna tólenedi. Onyń mólsheri aktivtiń bastapqy baǵasyna bailanysty:
- bastapqy baǵasy 500 AEK-ten tómen aktivter úshin - 15%;
- 500 AEK jáne odan joǵary aktivter úshin - 10%.
Eger qatysýshy jeńimpaz atansa, tólengen jarna múlik qunynyń esebine qosylady. Al jeńimpaz anyqtalmasa, qarajat tolyq qaitarylady. Biraq satyp alýdan bas tartqan nemese tólemdi ýaqytynda júrgizbegen qatysýshynyń kepildik jarnasy qaitarylmaidy.
Múlik arzanǵa túse me?
Ádette aktivtiń bastapqy baǵasyn táýelsiz baǵalaýshylar belgileidi, sondyqtan ol naryqtyq qunǵa jaqyn bolady. Alaida múlik alǵashqy saýdada ótpese, ekinshi ainalymda baǵasy 15%-ǵa tómendeidi. Eger taǵy satylmasa, úshinshi kezeńde qun birden 30%-ǵa deiin arzandaýy múmkin.
Mysal
Kompaniia málimetinshe, Almatydaǵy «Baitaq» shaǵyn aýdanyndaǵy jer ýchaskesi aýktsionǵa 176 mln teńgemen shyǵarylǵan. Qyzý saýda barysynda onyń baǵasy 657 mln teńgege deiin ósip, jeńimpaz aktivti bastapqy qunynan tórt ese qymbatqa satyp alǵan.
Múlik qashan rásimdeledi?
Aýktsion qorytyndysy sol kúni hattamamen bekitiledi. Satyp alý-satý sharty 10 kún ishinde onlain jasalady. Al satyp alýshy kelisimshartqa qol qoiǵan kúnnen bastap 30 kún ishinde tolyq tólem júrgizýi tiis. Qarajat tolyq túsken soń múlik jańa iesiniń menshigine ótedi.
