Jetisý oblysynda dáriger tapshylyǵy máselesin sheshý maqsatynda ótken jyldan bastap respýblika boiynsha alǵash ret óńirde dárigerlerge kóterme aqy tólene bastady. Qabyldanǵan sharalardyń nátijesinde oblystaǵy kadr tapshylyǵy 20,3%-ǵa qysqardy,- dep habarlaidy Dalanews.kz
Oblys ákiminiń bastamasymen júzege asyrylyp jatqan atalmysh baǵdarlamanyń aiasynda jergilikti biýdjet esebinen aýyldyq jerlerge jumys isteýge kelgen dárigerlerge 10 mln. teńgeden, al qalaǵa kelgenderge 5 mln. teńge kóleminde kóterme aqy tólenedi. Ol úshin aldymen úsh ailyq synaq merziminen sátti ótý kerek. Budan ári dáriger sol óńirdegi meditsina mekemesinde keminde bes jyl jumys isteýi tiis.
Baǵdarlama bastalǵaly beri 110 dárigerge kóterme aqy tólendi. Olardyń qatarynda Aksý aýdandyq ortalyq aýrýhanasynda jumys isteitin dárigerler otbasy Qairat Qońyrbaev pen Kámshat Janǵabaeva da bar.
– Ózim kardiologpyn, al zaiybym – akýsher-ginekolog. Ekeýimizdiń meditsina salasyndaǵy jalpy eńbek ótilimiz – 18 jyl. Otbasy retinde 20 mln. teńge kóleminde kóterme aqy aldyq, sonyń arqasynda baspanaly boldyq. Bul – jas mamandar úshin de, halyq úshin de óte paidaly baǵdarlama. Sebebi osyndai qoldaýdyń arqasynda óńirdiń aýyldaryna jumys isteýge kerekti mamandar kelýde, – dedi Q. Qońyrbaev.
Búgin óńirde ótken Meditsina qyzmetkerleri kúnine arnalǵan saltanatty is-sharada aimaqqa jumys isteýge kelgen mamandarmen áńgimelesken Jetisý oblysynyń ákimi Beibit Isabaev:
- Oblys ákimdigi óz tarapynan zamanaýi meditsinalyq jabdyqtarmen qamtamasyz etip, aýrýhanalar men emhanalar salýǵa kóp kóńil bólip keledi. Bul rette tek qalalarda ǵana emes, birinshi kezekte aýyldyq jerlerge erekshe nazar aýdaryp otyrmyz. Degenmen kóp nárse dárigerlerdiń, jalpy meditsina qyzmetkerleriniń biliktiligine bailanysty. Sondyqtan qolda bar múmkindikterdi paidalanyp, erte diagnostikalaý men durys diagnoz qoiýǵa erekshe kóńil bólip, sapaly em júrgizý kerek. Bul rette óz isine adal, únemi biliktiligin arttyryp otyratyn, jaýapkershiligi bar mamandardyń róli eleýli. Óitkeni meditsina - jai bir qatardaǵy jumys emes, adam óz ómiri men densaýlyǵyn senip tapsyratyn asa jaýapty kásip. Sondyqtan sizderdiń eńbekterińizge tabys, otbasylaryńyzǵa baq-bereke tileimin - dedi B. Isabaev.
Atap ótsek, óńirde meditsina qyzmetkerleriniń biliktiligin arttyrý jumystary turaqty júrgiziledi. Bul baǵytta Túrkiia, Ońtústik Koreia syndy shet memleketterdiń mamandarymen tájiribe almasý jáne taǵylymdamadan ótý qarastyrylǵan. Sonymen qatar suranysqa ie beiindi meditsina mamandaryn daiarlaý maqsatynda 2024 jyly 45 maman rezidentýrada jiberilip, oqyp jatyr.
Sondai-aq biyl 18 meditsina mamany jumysqa kelgen Kóksý aýdanynda oblys ákiminiń tapsyrmasymen meditsina qyzmetkerlerine arnap 20 páterlik bes qabatty turǵyn úi salynýda.
