AQSh-tyń Denver halyqaralyq áýejaiynda qaiǵyly oqiǵa boldy. Frontier Airlines áýe kompaniiasyna tiesili jolaýshylar ushaǵy ushýǵa daiyndalyp jatqan sátte áýejai jolaǵynda júrgen adamdy qaǵyp ketken, dep habarlaidy dalanews.kz.
Oqiǵa 8 mamyr kúni keshki ýaqytta tirkelgen. Los-Andjeleske bet alǵan Airbus A321 ushaǵy ekpin alyp kele jatqan kezde ushý jolaǵynda júrgen adamdy basyp ótken.
Amerikalyq BAQ-tyń habarlaýynsha, oqiǵa saldarynan adam sol jerde kóz jumǵan. Soqqydan keiin ushaq qozǵaltqyshynda qysqa ýaqytqa órt shyqqany da aityldy.
Áýejaidaǵy órt sóndirý qyzmeti jalyndy tez arada sóndirgen. Ushaq bortynda 224 jolaýshy men 7 ekipaj múshesi bolǵan. Oqiǵadan keiin ushqyshtar reisti toqtatý týraly sheshim qabyldaǵan.
Keiin áleýmettik jelide ekipaj ben dispetcher arasyndaǵy áńgime jazbasy tarady.
"Dispetcher, Frontier 4345. Biz ushý jolaǵynda toqtap turmyz… Biz bireýdi qaǵyp kettik… qozǵaltqyshta órt shyqty", – degen ushqyshtyń daýysy jazbada estiledi.
Odan soń ekipaj komandiri ushaq ishinde tútin paida bolǵanyn aityp, jolaýshylardy shuǵyl evakýatsiialaý qajet ekenin habarlaǵan.
Borttaǵy adamdar úrlemeli traptar arqyly ushý jolaǵyna túsirilip, keiin arnaiy avtobýstarmen terminalǵa jetkizildi.
Aldyn ala aqparat boiynsha, bir jolaýshy jeńil jaraqat alǵan. Ushaqtaǵy barlyq adam meditsinalyq tekserýden ótti.
Frontier Airlines kompaniiasy oqiǵanyń mán-jaiyn anyqtaý úshin áýejai ákimshiligi jáne qaýipsizdik qyzmetterimen birlesip jumys istep jatqanyn málimdedi.
Qazir Denver politsiiasy men AQSh-tyń Ulttyq kólik qaýipsizdigi keńesi tergeý júrgizip jatyr. Mamandar adamnyń ushý jolaǵyna qalai kirip ketkenin anyqtaý úshin áýejai aýmaǵyndaǵy qorshaýlar men qaýipsizdik júiesin tekserip jatyr.
