Atyraýda emhanadan 573 million teńge jymqyrǵan býhgalter sottaldy, - dep habarlaidy Dalanews.kz.
Isti Atyraý qalasynyń №2 soty qaraǵan. Býhgalter asa iri mólsherde senip tapsyrylǵan bóten múlikti iemdengeni, sondai-aq qylmystyq jolmen alynǵan aqshany zańdastyrǵany úshin aiyptalǵan.
Sottyń anyqtaǵany
Atyraý qalalyq emhanasynyń bas býhgalteri qyzmet babyn paidalanyp, paida tapqysy kelip, 2012-2023 jyldar aralyǵynda ózine senip tapsyrylǵan 573 mln teńgeden astam biýdjet qarajatyn iemdenip, bankterdegi óz esep-shottaryna aýdarǵan.
Qylmystyq jolmen alynǵan osy qarajatty aýdarý túrinde mámileler jasasý arqyly zańdastyrǵan. Emhanaǵa asa iri mólsherde zalal keltirilgen. Isti qaraý barysynda sottalýshy 3 mln teńgeni ótegen.
Taraptardyń ustanymy
Prokýror sottalýshyny 8 jyl merzimge bas bostandyǵynan aiyrýdy surady. Sottalýshy óz kinásin ishinara moiyndap, shynaiy túrde ókinip, jeńil jaza túrin taǵaiyndaýdy surady.
Sot sheshimi
Sottalýshynyń aiybyn ishinara moiyndap, shynaiy túrde ókinýi, asyraýynda jas balalarynyń bolýy, keltirilgen ziiandy ishinara óteýi – jeńildetetin mán-jai retinde tanyldy. Aýyrlatatyn mán-jailar anyqtalmady.
Sottalýshy taǵylǵan aiyptar boiynsha kináli dep tanylyp, qylmystyq jolmen tabylǵan qarajatqa satyp alynǵan múlki memleket paidasyna tárkilenip, qarajat jáne materialdyq jaýaptylyqqa bailanysty qyzmetpen ainalysý quqyǵynan 10 jylǵa aiyra otyryp, 8 jyl merzimge bas bostandyǵynan aiyrý jazasy taǵaiyndaldy.
Apelliatsiia birinshi satydaǵy sottyń úkimimen kelisti. Sot úkimi zańdy kúshine endi.
