اتىراۋدا ەمحانادان 573 ميلليون تەڭگە جىمقىرعان بۋحگالتەر سوتتالدى، - دەپ حابارلايدى Dalanews.kz. 

ءىستى اتىراۋ قالاسىنىڭ №2 سوتى قاراعان. بۋحگالتەر اسا ءىرى مولشەردە سەنiپ تاپسىرىلعان بوتەن ءمۇلiكتi يەمدەنگەنى، سونداي-اق قىلمىستىق جولمەن الىنعان اقشانى زاڭداستىرعانى ءۇشىن ايىپتالعان. 

سوتتىڭ انىقتاعانى

اتىراۋ قالالىق ەمحاناسىنىڭ باس بۋحگالتەرى قىزمەت بابىن پايدالانىپ، پايدا تاپقىسى كەلىپ، 2012-2023 جىلدار ارالىعىندا وزىنە سەنىپ تاپسىرىلعان 573 ملن تەڭگەدەن استام بيۋدجەت قاراجاتىن يەمدەنىپ، بانكتەردەگى ءوز ەسەپ-شوتتارىنا اۋدارعان.

قىلمىستىق جولمەن الىنعان وسى قاراجاتتى اۋدارۋ تۇرىندە مامىلەلەر جاساسۋ ارقىلى زاڭداستىرعان. ەمحاناعا اسا ءىرى مولشەردە زالال كەلتىرىلگەن. ءىستى قاراۋ بارىسىندا سوتتالۋشى 3 ملن تەڭگەنى وتەگەن.

تاراپتاردىڭ ۇستانىمى

پروكۋرور سوتتالۋشىنى 8 جىل مەرزىمگە باس بوستاندىعىنان ايىرۋدى سۇرادى. سوتتالۋشى ءوز كىناسىن ءىشىنارا مويىنداپ، شىنايى تۇردە وكىنىپ، جەڭىل جازا ءتۇرىن تاعايىنداۋدى سۇرادى.

سوت شەشىمى

سوتتالۋشىنىڭ ايىبىن ءىشىنارا مويىنداپ، شىنايى تۇردە وكىنۋى، اسىراۋىندا جاس بالالارىنىڭ بولۋى، كەلتىرىلگەن زياندى ءىشىنارا وتەۋى  – جەڭىلدەتەتىن ءمان-جاي رەتىندە تانىلدى. اۋىرلاتاتىن ءمان-جايلار انىقتالمادى.

سوتتالۋشى تاعىلعان ايىپتار بويىنشا كىنالى دەپ تانىلىپ، قىلمىستىق جولمەن تابىلعان قاراجاتقا ساتىپ الىنعان مۇلكى مەملەكەت پايداسىنا تاركىلەنىپ، قاراجات جانە ماتەريالدىق جاۋاپتىلىققا بايلانىستى قىزمەتپەن اينالىسۋ قۇقىعىنان 10 جىلعا ايىرا وتىرىپ، 8 جىل مەرزىمگە باس بوستاندىعىنان ايىرۋ جازاسى تاعايىندالدى.

اپەللياسيا ءبىرىنشى ساتىداعى سوتتىڭ ۇكىمىمەن كەلىستى. سوت ۇكىمى زاڭدى كۇشىنە ەندى.