«Atyraý oblysy ákimi Mahambet Dosmuhambetovtiń tóraǵalyǵymen sybailas jemqorlyqpen kúres baǵytyndaǵy óńirlik komissiianyń alǵashqy otyrysy ótti», - dep habarlaidy Atyraý oblystyq kommýnikatsiialar qyzmeti.
Jiynda Transperensi Interneshnl uiymynyń Qazaqstandaǵy ókildigi júrgizgen "2020 jylǵy Qazaqstandaǵy sybailas jemqorlyq jai-kúiiniń monitoringi" zertteýiniń nátijeleri jariialanyp, Atyraý oblysyndaǵy sybailas jemqorlyq deńgeii jáne aldyn alý sharalary qaraldy.
Transperensi uiymynyń Qazaqstandaǵy sarapshylary qalalar, oblys jáne aýdan ortalyqtary deńgeiinde 9 000 respondentpen saýalnama júrgizip, "ashyq dialog" portalyna kelip túsken 1 347 ótinishti zerttegen.
«Halyqqa júrgizilgen saýalnama nátijeleri memlekettik organdarǵa júgingen kezde sybailas jemqorlyqqa tap bolǵan adamdardyń úlesi 2019 jylmen salystyrǵanda 2,1% - ǵa tómendegen»,- dedi QR Sybailas jemqorlyqqa qarsy is-qimyl agenttiginiń Atyraý oblysy boiynsha departamentiniń basshysy Qanat Súleimenov.
Eske sala keteiik, Atyraý oblystyq sybailas jemqorlyqqa qarsy kúres departamentiniń birinshi orynbasary Aidos Mamyttyń birneshe kún buryn óńirde jemqorlyq faktileri 9 paiyzǵa tómendegenin atap ótken bolatyn.
Otyrysta «Adaldyq alańy» jobalyq keńsesiniń jetekshisi Alfiia Ádieva da ótken jyly atqarylǵan jumystar týraly baiandama jasady.
«Adaldyq alańy» jobalyq keńsesi qoǵamda sybailas jemqorlyqqa qarsy mádenietti qalyptastyrý maqsatynda 72 aqparattyq-nasihattyq jumys júrgizilgen.
Sonymen qatar, joba jetekshisi turǵyndardyń biliktilikterin arttyrý úshin elektrondyq qyzmetter boiynsha azamattar úshin oqytý beinerolikterin ázirleýdi, ashyqtyqty qamtamasyz etý maqsatynda Atyraý oblysyndaǵy termojańǵyrtý júiesin tsifrlandyrýdy, iaǵni arnaiy sait jasaý týraly usynys bildirdi.
Jiyndy qorytyndylǵan aimaq basshysy Mahambet Dosmuhambetov óńirde jemqorlyq deńgeiiniń tómendegenine qaramastan, atalǵan indettiń aldyn alý úshin quzyrly sala qyzmetkerleri jumysty áli de kúsheitý qajettigin basa aitty. Jemqorlyqpen kúres qashan da kún tártibinde turatyn másele ekenine toqtalǵan ol tiisti laýazym ielerine birqatar tapsyrma berdi.
