Atyraý oblysynyń Jylyoi aýdanynda 2016 jyly 605 million teńgege salynǵan 160 oryndyq «Baldáýren» balabaqshasy apatty jaǵdaida dep tanylyp, súriletin boldy,- dep habarlaidy Dalanews.kz AqJaiyq basylymyna silteme jasap.
Shoqpartoǵai aýylyndaǵy jańa balabaqsha paidalanýǵa berilgen soń kóp uzamai-aq qabyrǵalarynda jaryqtar paida bola bastaǵan. Merdiger kompaniia — «AtyraýRemStroiMontaj» JShS birneshe márte jóndeý jumystaryn júrgizgenimen, irgetastyń shógýine tosqaýyl bola almady. 2022 jyly ǵimarat apatty dep tanylyp, tolyqtai jabyldy.
Qurylysqa jumsalǵan 605 million teńge — halyqqa tiesili qarajat. Biraq balabaqshanyń qiraýyna naqty ne sebep bolǵany áli kúnge deiin anyqtalmaǵan. Resmi tergeý bastaldy ma, kináliler jaýapqa tartyldy ma — bul týraly eshqandai aqparat joq.
Beiresmi boljamdar boiynsha, ǵimarattyń shógýine jer teliminiń durys tańdalmaýy nemese qadalardyń qaǵylmai qalýy sebep bolýy múmkin. Biraq bul – tek boljam. Al el qarjysy jelge ushyp jatqanda, naqty qorytyndy men jaýapty tulǵalar jaily únsizdik — bul máseleni odan ári kúrdelendiredi.
"Balabaqsha jabylǵanyna úsh jyl boldy. 20 bala Qulsarydaǵy balabaqshalarǵa aýystyryldy, mektep janynan 82 balaǵa arnalǵan shaǵyn toptar ashyldy. Keibir balalar úiinde otyr. Degenmen suranys artyp keledi, halyq balabaqshanyń qaita ashylǵanyn qalaidy", – dedi aýdandyq bilim bólimi basshysynyń mindetin atqarýshy Gúljansara Tańatarova.
Jylyoi aýdany ákiminiń orynbasary Gúlnafis Aishýaqovanyń aitýynsha, balabaqsha ǵimaraty aýdandyq bilim bóliminiń balansynda tur. Tehnikalyq saraptamadan keiin ǵimaratty buzý týraly túpkilikti sheshim qabyldanǵan.
Al aýylda dál sol "Teńizshevroil" JShS-niń qoldaýymen jańa balabaqsha salý jumystary bastalypty. Bul joly 280 oryndyq balabaqsha, kelesi jyly paidalanýǵa beriledi dep josparlanǵan.
Al burynǵy balabaqshaǵa jumsalǵan 605 million teńge jelge ushty.
