Nazarbaev Ýniversiteti alǵash ret álemniń úzdik 400 ýniversitetiniń qataryna kirdi. Bul týraly depýtat Ashat Aimaǵambetov áleýmettik jelidegi paraqshasynda jazdy, dep habarlaidy dalanews.kz.
Onyń málimetinshe, ýniversitet Times Higher Education (THE) álemdik reitinginiń 2027 jylǵy shyǵarylymynda 376–400-oryndar tobyna engen.
Buǵan deiin Nazarbaev Ýniversiteti 2025 jyly 401–500-oryndar tobynda bolsa, odan bir jyl buryn 501–600-oryndar qatarynda bolǵan.
Ashat Aimaǵambetov bul nátijeni jas ýniversitet úshin mańyzdy jetistik dep baǵalady.
«Nazarbaev Ýniversiteti álemdik úzdik ýniversitetterdiń top-400 qataryna kirdi! Barshańyzdy osy tamasha nátijemen quttyqtaimyn!
Times Higher Education álemdik reitinginiń 2027 jylǵy shyǵarylymynda ýniversitet 376-400 oryndar tobyna endi!
Ol 2025 jyly 401-500, odan bir jyl buryn 501-600 oryndar tobynda bolǵan edi.
Jas ýniversitet úshin bul - óte úlken jetistik», – dep jazdy ol.
Depýtat THE reitinginiń ádistemesine de toqtaldy. Onyń aitýynsha, bul reitingte zertteý ortasy men ǵylymi zertteýler sapasyna erekshe mán beriledi.
Aimaǵambetov Nazarbaev Ýniversiteti zertteý sapasy boiynsha 100 baldyń 84,1-in jinaǵanyn atap ótti.
«Bul jetistikke oqytýshylar men zertteýshilerdiń kóp jylǵy eńbegi, ýniversitettiń jańa basshylyǵy men búkil ujymynyń jumysy negiz boldy», – dedi ol.
Sondai-aq depýtat ýniversitettiń derbestigi, uzaq merzimdi investitsiialar, halyqaralyq áriptestik jáne myqty mamandardy tartý múmkindigi nátijege yqpal etkenin jetkizdi.
Ashat Aimaǵambetov mundai ýniversitetterdiń Qazaqstan úshin mańyzy tek halyqaralyq reitingpen shektelmeitinin aitty. Onyń sózinshe, bul talantty jastarǵa el ishinde sapaly bilim alyp, ǵylymmen ainalysýǵa, halyqaralyq jobalarǵa qatysýǵa jáne zamanaýi zerthanalarda jumys isteýge múmkindik beredi.
