Astanany jyrymen áldiledi
Astananyń 20 jyldyǵyna orai jáne Elbasynyń «Bolashaqqa baǵdar: rýhani jańǵyrý» maqalasyn, ondaǵy rýhani qundylyqtardy urpaqqa ónege etý, halyq arasynda nasihattaý, otansúigishtikke tárbieleý, óleń qudyreti arqyly memlekettik tildiń mártebesin kóterý maqsatynda ótikizilgen jyr dodasyn Almaty oblysynyń tilderdi damytý jónindegi basqarmasynyń basshysy Aidar Bashbaev ashyp, izgi tilegin arnady.
«Saiyn Saryarqa tósinde Qazaq eliniń táýelsizdiginiń nyshany ispettes ásem qalamyz Astananyń boi kótergenine de 20 jyl toldy. Búginde sáýleti men dáýleti jarasqan elordamyzdy tórtkúl dúnie tanyp otyr. Astana jańa ǵasyrdyń, jańa dáýirdiń jasampaz shahary atandy. Astana bar qazaqtyń bas qalasyna ainaldy» – degen Aidar Karbozuly elorda toiy – eldiń toiy, eldiktiń merekesi, ulttyń qýanyshy, memlekettiń mereii bola beretinin aityp, jyr músháirasyna qatysyp otyrǵan aqyndarǵa sáttilik tiledi.
Osyndai ádemi tilekten keiin sahna tórine irikteýden ótken aqyndar shyqty. Olardyń árqaisysy Astananyń 20 jyldyǵyna arnap jazǵan óleńderin oqyp, jyrlarymen kópshiliktiń júregin terbedi.
Saiys bolǵan soń onyń óz jeńimpazdary bolary anyq. Jyr dodasynda jeti birdei aqyn júldeli oryndardy qanjyǵasyna bailasa, qalǵan aqyndarǵa basqarmanyń Alǵys haty tabys etildi.
Basqarmanyń úshinshi dárejeli diplomy jáne 80 myń teńge aqshalai syilyqpen taldyqorǵandyq Azamat Nurmuhan, Baqbergen Altai jáne Panfilov aýdanynan kelgen Ǵapý Erkin marapattaldy. Júldeli ekinshi oryn jáne 100 myń teńgelik sertifikat eki aqynǵa buiyrdy. Olar Jambyl aýdandyq «Atameken» gazeti bas redaktorynyń orynbasary Ainur Tóleý jáne oblystyq «Jetisý» gazetiniń tilshisi Asyl Sultanǵazy. Birinshi dárejeli diplom jáne 120 myń teńge aqshalai syilyqty oblystyq «Jetisý» gazetiniń tilshisi Qozybai Qurman aldy.
Jyr dodasynda elorda týrasynda erekshe oi-tolǵanyspen óleń jazǵan oblystyq «Jetisý» gazetiniń tilshisi Muhtar Kúmisbek basqarmanyń bas júldesi men 150 myń teńge syilyqty ielendi.
Aita keteiik, jyl basynda jariialanǵan baiqaýǵa barlyǵy 39 úmitkerden ótinish tússe, onyń 15-i qazylardyń tóreligimen irikteýden ótip, jyr músháirasyna qatysýǵa joldama aldy.
