استانانىڭ 20 جىلدىعىنا وراي جانە ەلباسىنىڭ «بولاشاققا باعدار: رۋحاني جاڭعىرۋ» ماقالاسىن، ونداعى رۋحاني قۇندىلىقتاردى ۇرپاققا ونەگە ەتۋ، حالىق اراسىندا ناسيحاتتاۋ، وتانسۇيگىشتىككە تاربيەلەۋ، ولەڭ قۇدىرەتى ارقىلى مەملەكەتتىك ءتىلدىڭ مارتەبەسىن كوتەرۋ ماقساتىندا وتىكىزىلگەن جىر دوداسىن الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشبايەۆ اشىپ، ىزگى تىلەگىن ارنادى.
«سايىن سارىارقا توسىندە قازاق ەلىنىڭ تاۋەلسىزدىگىنىڭ نىشانى ىسپەتتەس اسەم قالامىز استانانىڭ بوي كوتەرگەنىنە دە 20 جىل تولدى. بۇگىندە ساۋلەتى مەن داۋلەتى جاراسقان ەلوردامىزدى تورتكۇل دۇنيە تانىپ وتىر. استانا جاڭا عاسىردىڭ، جاڭا ءداۋىردىڭ جاسامپاز شاھارى اتاندى. استانا بار قازاقتىڭ باس قالاسىنا اينالدى» – دەگەن ايدار كاربوز ۇلى ەلوردا تويى – ەلدىڭ تويى، ەلدىكتىڭ مەرەكەسى، ۇلتتىڭ قۋانىشى، مەملەكەتتىڭ مەرەيى بولا بەرەتىنىن ايتىپ، جىر ءمۇشايراسىنا قاتىسىپ وتىرعان اقىندارعا ساتتىلىك تىلەدى.
وسىنداي ادەمى تىلەكتەن كەيىن ساحنا تورىنە ىرىكتەۋدەن وتكەن اقىندار شىقتى. ولاردىڭ ءارقايسىسى استانانىڭ 20 جىلدىعىنا ارناپ جازعان ولەڭدەرىن وقىپ، جىرلارىمەن كوپشىلىكتىڭ جۇرەگىن تەربەدى.
سايىس بولعان سوڭ ونىڭ ءوز جەڭىمپازدارى بولارى انىق. جىر دوداسىندا جەتى بىردەي اقىن جۇلدەلى ورىنداردى قانجىعاسىنا بايلاسا، قالعان اقىندارعا باسقارمانىڭ العىس حاتى تابىس ەتىلدى.
باسقارمانىڭ ءۇشىنشى دارەجەلى ديپلومى جانە 80 مىڭ تەڭگە اقشالاي سىيلىقپەن تالدىقورعاندىق ازامات نۇرمۇحان، باقبەرگەن التاي جانە پانفيلوۆ اۋدانىنان كەلگەن عاپۋ ەركىن ماراپاتتالدى. جۇلدەلى ەكىنشى ورىن جانە 100 مىڭ تەڭگەلىك سەرتيفيكات ەكى اقىنعا بۇيىردى. ولار جامبىل اۋداندىق «اتامەكەن» گازەتى باس رەداكتورىنىڭ ورىنباسارى اينۇر تولەۋ جانە وبلىستىق «جەتىسۋ» گازەتىنىڭ ءتىلشىسى اسىل سۇلتانعازى. ءبىرىنشى دارەجەلى ديپلوم جانە 120 مىڭ تەڭگە اقشالاي سىيلىقتى وبلىستىق «جەتىسۋ» گازەتىنىڭ ءتىلشىسى قوزىباي قۇرمان الدى.
جىر دوداسىندا ەلوردا تۋراسىندا ەرەكشە وي-تولعانىسپەن ولەڭ جازعان وبلىستىق «جەتىسۋ» گازەتىنىڭ ءتىلشىسى مۇحتار كۇمىسبەك باسقارمانىڭ باس جۇلدەسى مەن 150 مىڭ تەڭگە سىيلىقتى يەلەندى.
ايتا كەتەيىك، جىل باسىندا جاريالانعان بايقاۋعا بارلىعى 39 ۇمىتكەردەن ءوتىنىش تۇسسە، ونىڭ 15ء-ى قازىلاردىڭ تورەلىگىمەن ىرىكتەۋدەن ءوتىپ، جىر ءمۇشايراسىنا قاتىسۋعا جولداما الدى.
