Astana qalasyndaǵy №9 «Zerde» mamandandyrylǵan litseiiniń 11-synyp oqýshysy Aiala Mahanbetáli álemniń jetekshi on ýniversitetinen birden resmi shaqyrtý aldy, dep habarlaidy Dalanews.kz.
Erekshe jetistik týraly elordanyń resmi paraqshasy jazdy. Bul shaqyrtýlar talapkerdiń jeke ótinishi negizinde emes, joǵary oqý oryndarynyń óz bastamasymen joldanǵan.
Shaqyrtý joldaǵan ýniversitetterdiń qatarynda Ivy League quramyna kiretin Harvard University men Brown University, sondai-aq University of Cambridge, Stanford University, Massachusetts Institute of Technology (MIT) jáne álemdik bedeldi reitingterde kósh bastap turǵan ózge de aldyńǵy qatarly joǵary oqý oryndary bar.
Basty ereksheligi – ýniversitetterdiń oqýshynyń akademiialyq jáne zertteýshilik áleýetin aldyn ala jan-jaqty saralap, sonyń negizinde oqýǵa shaqyrǵan. Mundai tájiribe álemdik joǵary bilim berý keńistiginde sirek kezdesedi jáne talapkerge kórsetilgen joǵary senimniń aiqyn dáleli sanalady.
Oqýshyǵa usynylǵan qarjylyq qoldaýdyń jalpy kólemi 2 million AQSh dollaryn quraidy. Atalǵan qarajat oqý shyǵyndaryn tolyq nemese ishinara óteýge múmkindik beredi.
Aialanyń akademiialyq joly 8-synyptan bastaý alady. Osy ýaqyt aralyǵynda ol halyqaralyq bilim berý baǵdarlamalaryna, akademiialyq jáne ǵylymi-zertteý jobalaryna turaqty túrde qatysyp keledi. Ýniversitetterden resmi shaqyrtý alǵanǵa deiin ol ártúrli elderden kelgen qatysýshylarmen birlesip halyqaralyq jobany iske asyryp, ony praktikalyq deńgeide júzege asyra bildi. Joba investitsiia tartyp, naqty nátijege qol jetkizgen.
Qazirgi tańda Aiala Kanadada ornalasqan kompaniiada osy joba aiasynda jumys istep, mekteptegi oqýyn kásibi qyzmetpen qatar alyp júr. Sonymen qatar, ol 11-synyp oqýshysy bola tura, ýniversitettik kýrstardan ótip, bolashaqta esepteletin akademiialyq kreditterdi aldyn ala meńgerýde.
Bul jetistik álemniń jetekshi ýniversitetteriniń zamanaýi ustanymyn aiqyn ańǵartady. Búginde olar tek úzdik talapkerlerdi irikteýmen shektelmei, akademiialyq áleýeti joǵary mekteptermen tikelei seriktestik ornatýǵa erekshe mán berip otyr.
