Búgin Astanadaǵy azamattyq ister jónindegi aýdanaralyq sotta Nazarbaevtar otbasynyń esimi ataldy. Munda QR Bas prokýratýrasynyń Aktivterdi qaitarý komiteti talapker retinde, al jaýapker – Nazarbaev N. B. qatysqan isti qaraý bastaldy, dep habarlaidy Dalanews.kz.
Áńgime, shamasy, marqum Bolat Nazarbaevtyń 41 jastaǵy uly Nurbol Nazarbaev týraly bolyp otyr. Degenmen istiń mán-jaiy qupiia saqtalýda. Komitet pen sot qupiialyqqa silteme jasady.
Sottyń túsindirmesi mynadai boldy:
"Atalǵan talap-aryzda jariialaýǵa jatpaityn jáne qyzmettik paidalanýǵa arnalǵan materialdar bar. Sol sebepti protsess ashyq júrgizilmeidi", - delingen jaýapta.
Aita keteiik, 8 qyrkúiekte Prezident Toqaev halyqqa Joldaýynda Aktivterdi qaitarý komitetin Investorlardyń quqyqtaryn qorǵaý komiteti etip qaita ataý qajet ekenin aitty. Ol: «Bas prokýratýra zańsyz aktiv ielerimen jaqsy jumys atqardy», – dep atap ótken. Bul sózderdi kóptegen saiasattanýshylar men sarapshylar «eski» men «jańa» Qazaqstan arasyndaǵy teketirestiń aiaqtalýy dep baǵalaǵan edi.
Osy turǵydan alǵanda, Bolat Nazarbaevtyń ulyna qarsy talap – Bas prokýratýranyń «eskimen» kúrestegi sońǵy qadamy ma, álde sarapshylar asyǵystyq tanytty ma degen suraq týyndaidy.
Nurbol Nazarbaev 2011–2017 jyldary Almaty oblystyq IID-de jumys istegen, onyń ishinde basshynyń orynbasary qyzmetin atqarǵan. 2017 jyly ashyq derekterge súiensek, ol Prime Capital Holding investitsiialyq qoryn quryp, baqylaý keńesin basqarǵan.
Aita ketsek, Nazarbaevtar otbasynyń aty jaqynda taǵy da aqparat alańynda ataldy. KazTAG agenttiginiń habarlaýynsha, Aqmola oblysynda Jer resýrstaryn basqarý departamenti Býrabai kýrortyndaǵy bedeldi jer telimderi úshin sottasyp jatyr. Jaýapkerler qatarynda Bolat Nazarbaevtyń balalary bar.
