بۇگىن استاناداعى ازاماتتىق ىستەر جونىندەگى اۋدانارالىق سوتتا نازاربايەۆتار وتباسىنىڭ ەسىمى اتالدى. مۇندا ق ر باس پروكۋراتۋراسىنىڭ اكتيۆتەردى قايتارۋ كوميتەتى تالاپكەر رەتىندە، ال جاۋاپكەر – نازاربايەۆ ن. ب. قاتىسقان ءىستى قاراۋ باستالدى، دەپ حابارلايدى Dalanews.kz.
اڭگىمە، شاماسى، مارقۇم بولات نازاربايەۆتىڭ 41 جاستاعى ۇلى نۇربول نازاربايەۆ تۋرالى بولىپ وتىر. دەگەنمەن ءىستىڭ ءمان-جايى قۇپيا ساقتالۋدا. كوميتەت پەن سوت قۇپيالىققا سىلتەمە جاسادى.
سوتتىڭ تۇسىندىرمەسى مىناداي بولدى:
"اتالعان تالاپ-ارىزدا جاريالاۋعا جاتپايتىن جانە قىزمەتتىك پايدالانۋعا ارنالعان ماتەريالدار بار. سول سەبەپتى پروسەسس اشىق جۇرگىزىلمەيدى"، - دەلىنگەن جاۋاپتا.
ايتا كەتەيىك، 8 قىركۇيەكتە پرەزيدەنت توقايەۆ حالىققا جولداۋىندا اكتيۆتەردى قايتارۋ كوميتەتىن ينۆەستورلاردىڭ قۇقىقتارىن قورعاۋ كوميتەتى ەتىپ قايتا اتاۋ قاجەت ەكەنىن ايتتى. ول: «باس پروكۋراتۋرا زاڭسىز اكتيۆ يەلەرىمەن جاقسى جۇمىس اتقاردى»، – دەپ اتاپ وتكەن. بۇل سوزدەردى كوپتەگەن ساياساتتانۋشىلار مەن ساراپشىلار «ەسكى» مەن «جاڭا» قازاقستان اراسىنداعى تەكەتىرەستىڭ اياقتالۋى دەپ باعالاعان ەدى.
وسى تۇرعىدان العاندا، بولات نازاربايەۆتىڭ ۇلىنا قارسى تالاپ – باس پروكۋراتۋرانىڭ «ەسكىمەن» كۇرەستەگى سوڭعى قادامى ما، الدە ساراپشىلار اسىعىستىق تانىتتى ما دەگەن سۇراق تۋىندايدى.
نۇربول نازاربايەۆ 2011–2017 جىلدارى الماتى وبلىستىق ىىد-دە جۇمىس ىستەگەن، ونىڭ ىشىندە باسشىنىڭ ورىنباسارى قىزمەتىن اتقارعان. 2017 جىلى اشىق دەرەكتەرگە سۇيەنسەك، ول Prime Capital Holding ينۆەستيسيالىق قورىن قۇرىپ، باقىلاۋ كەڭەسىن باسقارعان.
ايتا كەتسەك، نازاربايەۆتار وتباسىنىڭ اتى جاقىندا تاعى دا اقپارات الاڭىندا اتالدى. KazTAG اگەنتتىگىنىڭ حابارلاۋىنشا، اقمولا وبلىسىندا جەر رەسۋرستارىن باسقارۋ دەپارتامەنتى بۋراباي كۋرورتىنداعى بەدەلدى جەر تەلىمدەرى ءۇشىن سوتتاسىپ جاتىر. جاۋاپكەرلەر قاتارىندا بولات نازاربايەۆتىڭ بالالارى بار.
