Astanada turmystyq qaldyqtardy jinaityn túrli konteinerler ornatyla bastady
Búgin «qurǵaq» qaldyqtarǵa arnalǵan 19 sary konteiner «Esil» aýdanynda ornalasqan tórt turǵyn úi kesheninde ornalastyryldy. Shildede 45 aýlada osyndai 200 jáshik qoiylady dep josparlanýda. Jalpyl alǵanda, qalada sary tústi 6 276 konteiner paida bolady dep kútilýde.
– Biz qoqysty bólip jinaýdyń eń qarapaiym júiesin tańdap aldyq. Qaita paidalanylatyn shikizat sary konteinerge túskennen keiin qaldyqtardy óńdeitin zaýytqa jetkiziletiledi. Qanatqaqty joba óńdeý tereńdigin 25%-ǵa jetkizýge múmkindik beredi, – dep málimdedi qorshaǵan ortany qorǵaý jáne tabiǵatty paidalaný basqarmasy qaldyqtardy basqarý bóliminiń basshysy Ainur Sultanǵulova.
Joba aýa lastaýyshtarynyń mólsherin, qaldyqtar jetkiziletin poligondar sanyn azaityp, tabiǵi resýrstardy saqtaýǵa, olardy únemdeýge múmkindik beredi. Atalmysh jobany qala ákimdigi «Operator ROP» JShS-men birlesip iske asyryp jatyr. Sary konteinerlerdi Qazaqstanda jasalǵan mamandandyrylǵan jańa tehnikanyń 25 birligi bosatyp turady.
– Qaǵaz qaldyqtarynan karton qoraptardy, gigienalyq buiymdardy jasaýǵa bolady. Shyny bolsa, túrli qutylardy, plastik, metall shelekterdi, legenderdi jasaý úshin qaita qoldanýǵa jaramdy, – dep túsindirdi «Operator ROP» JShS-niń basqarýshy direktory Sergei Iýrcha.
Onyń aitýyna qaraǵanda, jyl saiyn Astanada qatty turmystyq qaldyqtardyń 300 myńnan astam tonnasy qalyptasady eken. Bul, shamamen, táýligine 1000 tonna. Qaldyqtardyń atalmysh kóleminiń 45% – qaita qoldanylyp, óńdeýge jaramdy shikizat.
