بۇگىن «قۇرعاق» قالدىقتارعا ارنالعان 19 سارى كونتەينەر «ەسىل» اۋدانىندا ورنالاسقان ءتورت تۇرعىن ءۇي كەشەنىندە ورنالاستىرىلدى. شىلدەدە 45 اۋلادا وسىنداي 200 جاشىك قويىلادى دەپ جوسپارلانۋدا. جالپىل العاندا، قالادا سارى ءتۇستى 6 276 كونتەينەر پايدا بولادى دەپ كۇتىلۋدە.
– ءبىز قوقىستى ءبولىپ جيناۋدىڭ ەڭ قاراپايىم جۇيەسىن تاڭداپ الدىق. قايتا پايدالانىلاتىن شيكىزات سارى كونتەينەرگە تۇسكەننەن كەيىن قالدىقتاردى وڭدەيتىن زاۋىتقا جەتكىزىلەتىلەدى. قاناتقاقتى جوبا وڭدەۋ تەرەڭدىگىن 25%-عا جەتكىزۋگە مۇمكىندىك بەرەدى، – دەپ مالىمدەدى قورشاعان ورتانى قورعاۋ جانە تابيعاتتى پايدالانۋ باسقارماسى قالدىقتاردى باسقارۋ ءبولىمىنىڭ باسشىسى اينۇر سۇلتانعۇلوۆا.
جوبا اۋا لاستاۋىشتارىنىڭ مولشەرىن، قالدىقتار جەتكىزىلەتىن پوليگوندار سانىن ازايتىپ، تابيعي رەسۋرستاردى ساقتاۋعا، ولاردى ۇنەمدەۋگە مۇمكىندىك بەرەدى. اتالمىش جوبانى قالا اكىمدىگى «وپەراتور روپ» جشس-مەن بىرلەسىپ ىسكە اسىرىپ جاتىر. سارى كونتەينەرلەردى قازاقستاندا جاسالعان مامانداندىرىلعان جاڭا تەحنيكانىڭ 25 بىرلىگى بوساتىپ تۇرادى.
– قاعاز قالدىقتارىنان كارتون قوراپتاردى، گيگيەنالىق بۇيىمداردى جاساۋعا بولادى. شىنى بولسا، ءتۇرلى قۇتىلاردى، پلاستيك، مەتالل شەلەكتەردى، لەگەندەردى جاساۋ ءۇشىن قايتا قولدانۋعا جارامدى، – دەپ ءتۇسىندىردى «وپەراتور روپ» ءجشس-نىڭ باسقارۋشى ديرەكتورى سەرگەي يۋرچا.
ونىڭ ايتۋىنا قاراعاندا، جىل سايىن استانادا قاتتى تۇرمىستىق قالدىقتاردىڭ 300 مىڭنان استام تونناسى قالىپتاسادى ەكەن. بۇل، شامامەن، تاۋلىگىنە 1000 توننا. قالدىقتاردىڭ اتالمىش كولەمىنىڭ 45% – قايتا قولدانىلىپ، وڭدەۋگە جارامدى شيكىزات.
