Astana qalasynyń turǵyny tanystary men kórshilerin aldap, 500 million teńgeden astam qarajatty iemdengeni úshin 6 jyl 6 aiǵa bas bostandyǵynan aiyryldy. Bul týraly Astana qalasynyń prokýratýrasy málimdedi, dep habarlaidy dalanews.kz.
Tergeý málimetinshe, sottalǵan áiel jábirlenýshilerdiń senimine kirip, ipoteka rásimdeýge nemese dekrettik tólemderdi alýǵa kómektesemin dep ýáde bergen. Osy syltaýmen olardy jyljymaityn múlikterin kepilge qoiyp nesie rásimdeýge nemese ózine aqsha berýge kóndirip, keiin alynǵan qarajatty jeke qajetine jumsaǵan.
Máselen, ol jábirlenýshilerdiń birine páterin bankke kepilge qoiyp, 16 million teńge nesie rásimdetken. Sonyń 9 million teńgeden astamyn óz paidasyna ielengen.
Qylmystyq istiń barlyq epizodtary boiynsha keltirilgen jalpy shyǵyn 500 million teńgeden asqan. Sot áieldi kináli dep tanyp, 6,5 jylǵa bas bostandyǵynan aiyrý jazasyn taǵaiyndady. Sondai-aq jábirlenýshilerdiń keltirilgen zalaldy óndirý týraly talaptary qanaǵattandyryldy. Úkim zańdy kúshine endi.
