Astanada ústinen turǵyn úidiń qasbeti men aýa baptaǵysh qulaǵan eki naýqas aýyr hálde jansaqtaý bóliminde jatyr. Qalǵan úsh zardap shekken adam da aýrýhanada. Al turǵyn úidiń qaptamasynyń opyrylýyna bailanysty politseiler qylmystyq is qozǵaǵan. Sapasyz salynǵan qurylys deregi boiynsha tergeý júrip jatyr, dep habarlaidy Dalanews.kz KTK telearnasyna silteme jasap.
Toǵyz qabatty turǵyn úidiń syrtqy kirpish qaptamasy opyrylyp túsip, úsh adam zardap shekken. Ári qarai olarǵa kómekke kelgen eki jedel járdem qyzmetkeri de aýyr jaraqat aldy. Feldsherdiń basyna biikten konditsioner qulap, bári jansaqtaý bóliminen bir-aq shyqty. Ótken senbide qannen-qapersiz ketip bara jatqan apaly-sińlilerdiń basyna turǵyn úidiń qasbeti qulaǵan. Aýyr jaraqat alǵan ekeý dereý aǵasyna qońyraý shalyp kómekke shaqyrady. Artynsha jan ushyra jetip kelgen er adam da sapasyz salynǵan qurylystan zardap shekken. Eki jedel járdem qyzmetkerin qosqanda, jalpy sany bes adam aýrýhanaǵa jetkizildi.
"Qaiyn apam qonaqqa kelem degen, dúkennen birdeme satyp alyp kelgisi kelgen. Qarasaq, otyr, aiqailap, shań, qan bolyp. Ar jaqqa qarasaq, tastyń astynda Ainýr jatyr, qaiyn sińlim. Kúieýim ózi júgirip kelgen. Júgirip barsam, kúieýim de jatyr, qanjosa bop, tastyń astynda, feldsherdiń aiaǵy jatyr", - deidi naýqastyń áieli Aigúl Qalieva.
Aq halatty Ádilet Zeinel sol kúni túsken naýqastardyń arasynan aýa baptaǵysh janshyp qanjosa bop jatqan áielin kórgende aiaq qoly qaltyrap turyp qalǵan. Úilengenine endi eki apta bolypty. "Jan saqtaý bóliminde jatqan jan jarymdy kórgen saiyn júregim qaq airylady" deidi dáriger.
"Dál osyndai jaǵdailardyń 100-den kóp bolmasa, azyn qabyldamaimyz, qulap jatady, jol-kólik apattary bolady. Biraq ózimniń áielim kelgen kezde men eshteńe istei almai qaldym, qolymnan eshteńe kelgen joq. Qolym dirildegennen, jylaǵannan basqa eshteńe istei almaimyn. Óitkeni ózińniń jaqyn adamyńdy kórgen kezde, ol óte aýyr bir sezim bolady eken", - deidi naýqastyń kúieýi Ádilet Zeinel.
Naýqastardyń jaqyndary tótenshe jaǵdai qyzmetkerleri der kezinde kelmedi dep otyr. Alaida qutqarýshylar bul aqparatty joqqa shyǵardy.
"Habarlama birinshi jedel járdem qyzmetine kelgen. Jedel járdem qyzmetiniń brigadasy sol jerge birinshi kelgen. Bizge, 112 qyzmetine habar jetkende qutqarýshylar dereý keldi. Áleýmenttik jelilerde "qutqarýshylar kesh keldi", "jumys jasamaidy" degen aqparat shyndyqqa janaspaidy", - deidi Astana TJD bastyǵynyń orynbasary Árlen Búrkitbai.
Qazir úsh naýqas ortaq palataǵa aýystyrylǵan. Al ekeýiniń jaǵdaiy óte aýyr deidi dárigerler. Politseiler "Sapasyz salynǵan qurylys" baby boiynsha tergeý bastap, oqiǵanyń mán-jaiyn anyqtaýǵa kiristi.
