استانادا ۇستىنەن تۇرعىن ءۇيدىڭ قاسبەتى مەن اۋا باپتاعىش قۇلاعان ەكى ناۋقاس اۋىر حالدە جانساقتاۋ بولىمىندە جاتىر. قالعان ءۇش زارداپ شەككەن ادام دا اۋرۋحانادا. ال تۇرعىن ءۇيدىڭ قاپتاماسىنىڭ وپىرىلۋىنا بايلانىستى پوليسەيلەر قىلمىستىق ءىس قوزعاعان. ساپاسىز سالىنعان قۇرىلىس دەرەگى بويىنشا تەرگەۋ ءجۇرىپ جاتىر، دەپ حابارلايدى Dalanews.kz كتك تەلەارناسىنا سىلتەمە جاساپ.

توعىز قاباتتى تۇرعىن ءۇيدىڭ سىرتقى كىرپىش قاپتاماسى وپىرىلىپ ءتۇسىپ، ءۇش ادام زارداپ شەككەن. ءارى قاراي ولارعا كومەككە كەلگەن ەكى جەدەل جاردەم قىزمەتكەرى دە اۋىر جاراقات الدى. فەلدشەردىڭ باسىنا بيىكتەن كونديسيونەر قۇلاپ، ءبارى جانساقتاۋ بولىمىنەن ءبىر-اق شىقتى.  وتكەن سەنبىدە قاننەن-قاپەرسىز كەتىپ بارا جاتقان اپالى-سىڭلىلەردىڭ باسىنا تۇرعىن ءۇيدىڭ قاسبەتى قۇلاعان. اۋىر جاراقات العان ەكەۋ دەرەۋ اعاسىنا قوڭىراۋ شالىپ كومەككە شاقىرادى. ارتىنشا جان ۇشىرا جەتىپ كەلگەن ەر ادام دا ساپاسىز سالىنعان قۇرىلىستان زارداپ شەككەن. ەكى جەدەل جاردەم قىزمەتكەرىن قوسقاندا، جالپى سانى بەس ادام اۋرۋحاناعا جەتكىزىلدى.

"قايىن اپام قوناققا كەلەم دەگەن، دۇكەننەن بىردەمە ساتىپ الىپ كەلگىسى كەلگەن. قاراساق، وتىر، ايقايلاپ، شاڭ، قان بولىپ. ار جاققا قاراساق، تاستىڭ استىندا اينۋر جاتىر، قايىن ءسىڭلىم. كۇيەۋىم ءوزى جۇگىرىپ كەلگەن. جۇگىرىپ بارسام، كۇيەۋىم دە جاتىر، قانجوسا بوپ، تاستىڭ استىندا، فەلدشەردىڭ اياعى جاتىر"، - دەيدى ناۋقاستىڭ ايەلى ايگۇل قالييەۆا.

اق حالاتتى ادىلەت زەينەل سول كۇنى تۇسكەن ناۋقاستاردىڭ اراسىنان اۋا باپتاعىش جانشىپ قانجوسا بوپ جاتقان ايەلىن كورگەندە اياق قولى قالتىراپ تۇرىپ قالعان. ۇيلەنگەنىنە ەندى ەكى اپتا بولىپتى. "جان ساقتاۋ بولىمىندە جاتقان جان جارىمدى كورگەن سايىن جۇرەگىم قاق ايرىلادى" دەيدى دارىگەر.

"ءدال وسىنداي جاعدايلاردىڭ 100-دەن كوپ بولماسا، ازىن قابىلدامايمىز، قۇلاپ جاتادى، جول-كولىك اپاتتارى بولادى. ءبىراق ءوزىمنىڭ ايەلىم كەلگەن كەزدە مەن ەشتەڭە ىستەي الماي قالدىم، قولىمنان ەشتەڭە كەلگەن جوق. قولىم دىرىلدەگەننەن، جىلاعاننان باسقا ەشتەڭە ىستەي المايمىن. ويتكەنى ءوزىڭنىڭ جاقىن ادامىڭدى كورگەن كەزدە، ول وتە اۋىر ءبىر سەزىم بولادى ەكەن"، - دەيدى ناۋقاستىڭ كۇيەۋى ادىلەت زەينەل.

ناۋقاستاردىڭ جاقىندارى توتەنشە جاعداي قىزمەتكەرلەرى دەر كەزىندە كەلمەدى دەپ وتىر. الايدا قۇتقارۋشىلار بۇل اقپاراتتى جوققا شىعاردى.

"حابارلاما ءبىرىنشى جەدەل جاردەم قىزمەتىنە كەلگەن. جەدەل جاردەم قىزمەتىنىڭ بريگاداسى سول جەرگە ءبىرىنشى كەلگەن. بىزگە، 112 قىزمەتىنە حابار جەتكەندە قۇتقارۋشىلار دەرەۋ كەلدى. الەۋمەنتتىك جەلىلەردە "قۇتقارۋشىلار كەش كەلدى"، "جۇمىس جاسامايدى" دەگەن اقپارات شىندىققا جاناسپايدى"، - دەيدى استانا تجد باستىعىنىڭ ورىنباسارى ارلەن بۇركىتباي. 

ءقازىر ءۇش ناۋقاس ورتاق پالاتاعا اۋىستىرىلعان. ال ەكەۋىنىڭ جاعدايى وتە اۋىر دەيدى دارىگەرلەر. پوليسەيلەر "ساپاسىز سالىنعان قۇرىلىس" بابى بويىنشا تەرگەۋ باستاپ، وقيعانىڭ ءمان-جايىن انىقتاۋعا كىرىستى.