Astanadaǵy «Jastar» saraiynda 1 mamyr – Qazaqstan halqynyń birligi kúnine arnalǵan merekelik kontsert ótip jatyr,- dep habarlaidy Dalanews.kz
«Is-shara aiasynda elimizde turatyn túrli etnostardyń mádenieti men ónerin tanystyratyn arnaiy kórme ótip jatyr. Kórmege kelýshilerge ár ult ókilderi salt-dástúrin, mádenietin, ulttyq taǵamdaryn kórsetýde. Keiin bul is-shara merekelik kontsertke ulasady. Arnaiy shaqyrylyp otyrǵan qazaq estradasynyń ánshisi Ushqyn Jamalbek jáne «Jastar» saraiynyń shyǵarmashylyq ujymy da óner kórsetedi. Sondai-aq, Jumysshy mamandyqtar jyly men Jeńistiń 80 jyldyǵyna arnalǵan arnaiy nómirlerimiz bar», – dedi «Jastar» saraiynyń media bóliminiń basshysy Dilnaz Murat.
Búgingi is-sharany Astana qalasynyń Mádeniet basqarmasy uiymdastyryp otyr.
Merekelik kontsertte «Daryn» memlekettik jastar syilyǵynyń laýreattary – Zarina Bojaqova, Álibek Álmádiuly jáne Tatiana Kim, sondai-aq sharanyń arnaiy qonaǵy Qurmash Mahan óz ónerin ortaǵa salady.
«Qazaqstan halqynyń birligi kúni – san túrli etnostardyń ókili bir shańyraqtyń astynda tatý-tátti ómir súrip jatqan beibit ári myzǵymas memleketimizdiń simvolyna ainalǵan mereke. Ol ulttyq birligimizdiń beriktigin, kópetnosty qoǵamymyzdaǵy ózara qurmet pen senimniń tereń tamyr jaiǵanyn pash etedi», – dedi Dilnaz Murat.
Kórme ulttyq dástúrlerdiń bai murasyn dáriptep, qoǵamdaǵy dostyq pen kelisimdi nyǵaitýǵa baǵyttalǵan.
