Astanada jeńil relsti kóliktiń (LRT) 22 shaqyrymdyq estakadalyq jolynyń qurylysyna qarastyrylǵan barlyq 799 tirek salynyp bitti. Oǵan 2,5 myń jumysshy jumyldyryldy, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Tirekterdi quiý úshin 53,7 myń tekshe metr beton jáne 42 myń tonna armatýra jumsalǵan. Tirektiń tómengi bóliginiń eni – 2-2,4 metr, joǵarǵy bóligi – 6,8 metr, biiktigi estakada jolynyń ótetin jerine bailanysty 5-ten 18 metrge deiin, bir tirektiń ortasha salmaǵy – 200 tonna.
Qazaqstandyq standarttar boiynsha V45 klasyndaǵy M600 markaly beton qoldanylǵanyn aita ketýimiz kerek. V45 klasyndaǵy beton gidroelektrostantsiialardy, bekinis qurylystaryn, býnkerlerdi, metropoliten, aýyr metallýrgiia kásiporyndaryn, himiialyq, ǵaryshtyq, qorǵanys zaýyttaryn, atom energetikasy obektilerin salýda qoldanylady.
Jeńil relsti transport elordadaǵy kólik infraqurylymyn jaqsartýǵa, qala turǵyndary men qonaqtaryna yńǵaily qoǵamdyq kólik júiesin usynýǵa baǵyttalǵan. Alaida, joba bastalǵannan beri ol túrli qiyndyqtarǵa tap bolǵany da jasyryn emes. LRT qurylysy alǵash ret 2011 jyly usynylǵan. Onyń basty maqsaty — Astananyń jyldam ósip kele jatqan halqynyń kólikke degen suranysyn qanaǵattandyrý. Joba boiynsha, jeńil relsti transport qalanyń áýejaiy men ortalyq aýdandaryn bailanystyryp, qoǵamdyq kólikti tiimdirek ári ekologiialyq taza etýi tiis. LRT qurylysy – eldiń kólik júiesin damytýǵa degen mańyzdy qadamdardyń biri.
