Astanada 471 myń kólik tirkelgen. Olardyń sany jyl saiyn 25–30 myńǵa artyp, qalaǵa kún saiyn 150 myńǵa jýyq kólik kirip-shyǵady, dep habarlaidy dalanews.kz.
Qaladaǵy kólik aǵynynyń ósýine bailanysty kóshe-jol jelisine túsetin júktemeni azaitý maqsatynda Kólik júiesin damytýdyń keshendi baǵdarlamasy júzege asyrylyp jatyr.
Biryńǵai operator retinde Jol qozǵalysyn basqarý ortalyǵy belgilengen. Ol turaq keńistigin, kólik qozǵalysyn, baǵdarshamdardyń jumysyn, kólikterdi evakýatsiialaýdy jáne kóliktik josparlaýdy úilestiredi.
Kólik aǵyndaryn basqarý ITS intellektýaldyq kólik júiesi arqyly júzege asyrylady. Qazir baǵdarshamdardyń 80 paiyzy osy basqarý júiesine qosylǵan.
Sonymen qatar Presight kompaniiasymen birlesip beinebaqylaý infraqurylymy jańartylǵan. Smart City jobasy aiasynda biyl jol qozǵalysy erejelerin buzýdy tirkeitin 1200-den astam keshen jumys istep tur.
Qalanyń Sitýatsiialyq ortalyǵyna 60 myńnan astam beinekamera biriktirilgen. Avtomatty túrde anyqtalatyn quqyq buzýshylyq túrleriniń sany 4-ten 15-ke deiin artqan. Budan bólek, jasandy intellekt negizinde beineanalitikanyń 35 túri engizilgen.
Kólik qozǵalysyn jeńildetý úshin baǵdarshamdardyń jumys rejimderi túzetilip, qozǵalys qarqyndy ýchaskelerde solǵa burylýǵa shekteý qoiylǵan. Onyń ornyna balamaly keri burylý oryndary uiymdastyrylýda.
Qoǵamdyq kólikti damytý jumystary da jalǵasyp jatyr. Qazir Astanada Bus Lane arnaiy avtobýs jolaqtarynyń uzyndyǵy 146 shaqyrymǵa jetken. Bul kórsetkish ótken jylmen salystyrǵanda 6,6 paiyzǵa artqan.
Sońǵy birneshe jylda avtobýs parkterindegi jyljymaly quram sany 60 paiyzǵa kóbeiip, 1200-den 1900 avtobýsqa deiin jetken.
Tarlan Astana jeńil relsti kólik júiesin avtobýs marshrýttarymen jáne kóliktik-logistikalyq toraptarmen integratsiialaý josparlanyp otyr. 2030 jylǵa qarai qoǵamdyq kólik paidalanýshylarynyń úlesin qazirgi 54 paiyzdan 60 paiyzǵa deiin arttyrý kózdelgen.
Sonymen qatar qalada jańa jol jobalary iske asyryla bastady. №38 kósheni F. Ońǵarsynova kóshesinen Qabanbai batyr dańǵylyna deiin uzartý Máńgilik El, Qabanbai batyr jáne Turan dańǵyldaryndaǵy kólik júktemesin azaitýǵa múmkindik beredi.
Qabanbai batyr dańǵyly boiynda eki deńgeili jol salý jobasy ázirlenip jatyr. Ol kólik qozǵalysyn toqtatpai uiymdastyryp, sol jaǵalaýdaǵy negizgi magistraldarǵa túsetin júktemeni azaitýdy kózdeidi.
Sondai-aq Hýsein ben Talal kóshesin ózen arqyly ótetin kópirmen jalǵastyrý josparlanǵan. Bul joba sol jaǵalaý men «Nurly jol» vokzaly aýdanyn bailanystyratyn qosymsha kólik baǵytyn qamtamasyz etedi.
Astanada jol-kólik jelisin damytý jáne jol qozǵalysy qaýipsizdigin arttyrý jumystary jalǵasyp jatyr.
