Búgin Astana qalasynyń Ippodrom alańynda Aqtóbe oblysynyń aýyl sharýashylyǵy taýar óndirýshileriniń qatysýymen jármeńke bastaldy. Jármeńke erteń, 14 qyrkúiekke deiin sozylady,- dep habarlaidy Dalanews.kz
Is-sharaǵa oblystyń 12 aýdany jáne Aqtóbe qalasynan 20-dan astam aýyl sharýashylyǵy taýar óndirýshileri men qaita óńdeýshi kásiporyndar qatysyp otyr.
Jármeńkeniń ashylýyna Aqtóbe oblysy ákiminiń orynbasary Ǵalymjan Eleýov, aýyl sharýashylyǵy basqarmasynyń basshysy Asqar Júsibaliev arnaiy baryp, jármeńkeniń ótý barysymen tanysty.
Kelýshilerge kontserttik baǵdarlama usynyldy.
Jármeńkede elordalyqtar men qala qonaqtaryna 73,2 tonna et, 39 tonna kartop pen kókónis, 8,9 tonna sút ónimderi, 24 myń dana jumyrtqa, 3,5 tonna balyq, 7,1 tonna shujyq ónimderi, 11 tonna un jáne un ónimderi, 5 tonna alkogolsiz sýsyndar, 2,4 tonna konditerlik ónim jáne 25,5 tonna ózge de taýarlar usynylýda. Jalpy kólemi 213,3 tonna ónim jetkizilgen.
Baǵalar Astana bazarlaryndaǵy qunnan 15-20 paiyzǵa tómen.
«Búgingi jármeńkege biz Aqtóbe oblysynyń Qarǵaly aýdanynan kelip otyrmyz. Negizinen et ónimderin – jylqy eti, siyr eti, qoi etin ákeldik. Budan bólek, kartop, kókónis jáne jergilikti kásipkerlerdiń shujyq ónimderi usynyldy. Biylǵy shara óte joǵary deńgeide uiymdastyrylǵan. Elordalyq jármeńke dástúrge ainalyp keledi. Biz byltyrǵy jyly da qatystyq, biyl da keldik, aldaǵy jyldary da keletin bolamyz.
Astanalyq turǵyndar men kelýshilerdiń qarasy kóp. Satýshylar da kóńildi, rizashylyqtaryn bildirýde. Negizinen bizdiń ónimderimiz jergilikti taýar óndirýshilerdiń baǵasynan 15–20 paiyzǵa tómen baǵada satylýda», - dedi Qarǵaly aýdany ákiminiń orynbasary Bekzat Badakov.
Sonymen qatar óńdeý kásiporyndary da óz ónimderin ákeldi. Olardyń qatarynda «Ais+» JShS men «Agrofirma Taý» JShS-nyń sút ónimderi, «Shyńǵys», «Abylai», «Shekshek Ata» qojalyqtarynyń qymyz, shubat, eshki súti, «Jańa-Áljan diirmen kombinaty» JShS men «Ramazan» JShS-nyń un jáne makaron ónimderi, «SPK Aibek», «Stepnoe», «Rokos» JShS-nyń et konservileri men shujyq ónimderi, sondai-aq jylyjai ónimderi men alkogolsiz sýsyndar bar.
«Aýyl amanaty» baǵdarlamasy aiasynda óńdelgen ónimder de saýdaǵa shyǵarylýda.
Jármeńkede ónimderdi tiimdi baǵamen satyp alǵan elordalyqtar óz rizashylyqtaryn bildirdi.
