Astanada 21 jastaǵy azamat burynǵy súiiktisin turaqty túrde ańdyp, qoqan-loqy kórsetkeni úshin 15 táýlikke ákimshilik qamaýǵa alyndy. Sonymen qatar ol stalking babymen qylmystyq jaýapkershilikke tartylýy múmkin. Bul týraly jýrnalist Mihail Kozachkov málimdedi, dep habarlaidy Dalanews.kz.
Jýyrda Astana qalasynyń mamandandyrylǵan aýdanaralyq ákimshilik quqyq buzýshylyqtar jónindegi sotynda 2004 jyly týǵan Bekzat Muratbekke qatysty ákimshilik hattama qaralǵan.
Sot materialdaryna sáikes, Jańa jyl qarsańynda ol turǵyn úi aýlasynda tanys qyzyna aiqailap, kópshiliktiń kózinshe balaǵat sózder aityp, ar-namysyn qorlaǵan. Oqiǵadan keiin qyz bul jaǵdaidy ata-anasyna aityp, politsiiaǵa júgingen.
Tekserý barysynda Bekzat Muratbektiń keiingi úsh ai boiy jábirlenýshini mazalap kelgeni anyqtalǵan. Ol qyzǵanysh tanytyp, janjal shyǵaryp, messendjerler arqyly qorlaityn habarlamalar joldaǵan, sondai-aq buryn ózine jumsalǵan aqshany qaitarýdy talap etken.
Belgili bolǵandai, jigit arasynda keshirim surap, túzelýge ýáde bergenimen, ýaqyt óte kele áreketterin qaita jalǵastyrǵan. Ol ózin prokýratýra qyzmetkeri retinde tanystyryp, qyzdy "túrmege otyrǵyzamyn" dep qorqytqan. Alaida bul aqparattyń shyndyqqa janaspaityny anyqtalǵan. Mundai áreketterdiń negizgi sebebi qyzǵanysh bolǵan.
Isti qaraǵan sýdia Qarlyǵash Jaqypbekova Bekzat Muratbekti usaq buzaqylyq jasaǵany úshin 15 táýlikke ákimshilik qamaýǵa alý týraly sheshim shyǵardy. Sonymen qatar qorǵaý nusqamasyna sáikes oǵan bir jyl boiy jábirlenýshige jaqyndaýǵa tyiym salyndy.
Budan bólek, sot Astana qalasynyń Politsiia departamentine jeke qaýly joldap, Bekzat Muratbektiń áreketterine qosymsha quqyqtyq baǵa berýdi tapsyrǵan.
Sýdianyń pikirinshe, onyń áreketterinde Qylmystyq kodekstiń 115-babynda kózdelgen stalking qylmysynyń belgileri bar.
