Memlekettik rámizder kúnine orai, Astanadaǵy jalpy bilim beretin mektepter men qosymsha bilim berý uiymdarynyń jazǵy lagerlerinde aýqymdy patriottyq is-shara uiymdastyryldy, – dep habarlaidy Dalanews.kz
Qalanyń 92 mektebi men 13 qosymsha bilim berý ortalyǵynyń qatysýymen ótken bul is-shara aiasynda 10 000-nan astam bala bir mezette Memlekettik ánurandy oryndady.
Mundaǵy maqsat – jas urpaqtyń boiynda otansúigishtik sezimdi qalyptastyrý, memlekettik rámizderge degen qurmetti arttyrý jáne ulttyq qundylyqtardy dáripteý.
Ánuran shyrqaý rásimi balalardyń óz Otanyna degen maqtanysh sezimin oiatyp, biriktirýshi rýh berdi. Mundai is-sharalar óskeleń urpaqty azamattyq jaýapkershilikke tárbieleýde mańyzdy ról atqarady.
Aita keteiik, 4 maýsym – Memlekettik rámizder kúni, bul mereke 2007 jyldan beri resmi túrde atalyp ótedi. Bul kún – Eltańba, Tý men Ánuran syndy táýelsizdigimizdiń nyshandaryn qurmetteýdiń jarqyn kórinisi.
