Astana – Táýelsizdiktiń jemisi. Óz kózqarasyńyzdy dáleldeńiz.
Ańyz ben aqiqattyń shyndyq shyraiyndai Asan babamyzdyń jelmaiamen jahandy kezip, halqyna qut meken bolatyn jeruiyqty izdeýinde jan tebirenterliktei syr jatyr emes pe? Ulytaýdan bastalar uly kóshimizdiń keńes dáýiri kezinde Astana qazyǵyn birde Orynbor, birde Qyzylordaǵa qadap, odan jasyl jelekti, tústi kilem Almatyǵa turaqtaýy Máskeýdiń pármenimen bolǵan edi. Elimiz táýelsizdigin alǵannan keiin ǵana elordanyń qai jerde bolýyn tańdaý múmkinshiligine Elbasymyz ie boldy. Astanamyzdyń Qazaqstannyń ortalyǵynda bolýy qai jaǵynan alyp qarasańda durys sheshim edi. Sebebi, Saryarqa talaidy kórdi, talaiǵa tózdi. Baǵzy babalarymyzdyń aq naizalaryn aspanǵa atqan aibyrly jeńisteriniń kýágeri boldy.
Endi mine, eki ǵasyr toǵysqanda jańa myńjyldyqtyń tabaldyryǵynda óshken janyp, ólgen tirilip, ketken ese túgendelip, jyǵylǵan tý qaita jelbirep, joǵalǵan eldik oralyp, qulaǵan orda qaita boi kótergenine de sebepker bolyp otyr. Qalai desekte Astana qazaqtyń bas qalasy bolyp, óskeleń urpaqtyń jarqyraǵan juldyzdai keleshegine óz úlesin qosary sózsiz. Shynyna keler bolsam óz basym áli kúnge deiin elimniń aq ordasyn óz kózimmen kórgen emespin. Tek kóz aldyma onyń ásem kórinisi gazet-jýrnaldardan oqyǵanym, teledidardan kórgenderim elesteidi. Onyń qazirgi sáýlet óneriniń úlgilerine sai boi túzegen biik te sulý ǵimarattary bir kezdegi qarapaiym oblys ortalyǵyn adam tanymastai ózgertkeni anyq. Qala sulýlyǵy qai adam balasyn bolsyn tamsandyratynyna kúmánim joq. Óitkeni, keń jazira dalada kósilip jatqan kemel sulýlyǵymen, kúmis kólderimen Esil, Nura sekildi qyz burymyndai tarqatylǵan ózenderimen ózine tartady. Sondyqtan bolar Astana men úshin árqashan saltanattyń qalasy, tasy órge domalap turǵan jandardyń mekeni bolyp elesteidi. Qazirgi tańda astanamyz álemdik, iskerlik bailanystyń kúre tamyryna ainalyp otyr. Onyń ózi Elbasynyń izgi saiasaty, kóregendigi men kemenger oiynyń jemisi, armany, maqsaty, halqynyń tarihynan nár alǵandyǵy shyǵar. Astanamyzdyń shańyraǵy biikke kóterilip, ýyǵy nyq qadalyp, keregesi kelisti jaiyldy deýge bolady. Astana qazirdiń ózinde aziialyq baitaqtardyń arasyndaǵy eń bir eýropalyq qala. Nursultan Nazarbaev Qazaqstannyń Eýraziialyq el ekenin, onyń astanasynyń orasan zor qos qurlyqtyń, ókpe tusynda ornalasqanyn, demek keleshekte qalanyń osynaý ulan-ǵaiyr keńistiktiń qýatty jelileri toǵysqan torabyna, 21 ǵasyrdaǵy ekonomikalyq, tehnologiialyq, aqparattar tasqynynyń arnasyna ainalatynyn atap kórsetken bolatyn.
Astana- búgin óskeleń qala. Kemel de kelisimdi oilardyń, izgi niet pen igi tileýdiń qalasy. Aitalyq, qalany qaq jarǵan Esil ózeniniń jaǵalaýyn kezinde basqan qamys- quraq qaba saqaldan arylyp, beton taqtaishalarmen tóselgen. Esildiń mármár jaǵalaýynan záýlim ǵimarattar salýǵa da, qalanyń ortalyq bóliginde eýropalyq úlgidegi shaǵyn oramdar turǵyzýǵa da oryn jeterlik. Endeshe, shahardyń keibir keń de túzý kósheleri dástúrli shyǵys baitaqtaryn, máselen, kórgenderge Kair men Delidi esestetetini sózsiz.
Elimizdiń jańadan oryn tepken ordasyn kórkeitý maqsatyna orai prezidentimiz 2001 jyly «Astana jańa qala» degen arnaiy ekonomikalyq aimaǵyn qurǵan bolatyn. Bul shara Esildiń sol jaǵalaýyna investitsiialar taratý, qurylysta ozyq tehnologiialardy paidalaný, sondai-aq qazirgi zamanǵy infraqurylym arqyly qurylysty qarqyndy túrde damytý edi. Sol sebepti Astanadaǵy úkimet sarailary, qurmetti oryndar, ministrlikter men qoǵamdyq ǵimarattar asa kórnekti sáýlettik beinege ie bolyp keledi. Osyndai ǵajap, ózge qalalardan erekshelenip turǵan Astanamyzdyń keskin-kelbeti Eýropa materiginde ornalasqan Parij qalasynyń dál ózinde júrgendei sezindiretin shyǵar. Parijge barǵandar eń aldymen Eifil munarasyn izdese Astanaǵa kelgender biiktigi 97 metrge jetetin «Astana-Báiterek» monýmentin izdeitin siiaqty. Osynyń ózi álem tórinen oryn alatyndai kórinis, shirkin! Bárin ait ta, birin ait degendei barlyǵynan da bas alań tórine kóz tastaǵan jan búkil tarihy- birigý tarihy bolǵan halqymyzdyń ómirinde kelisimdi biligimen, ádil sózimen, eliniń basyna aýyrtpashylyq túskende sheshendigimen alǵyrlyǵymen eline qorǵan bolǵan, asqan bedelge bólengen dana úsh bi- Áiteke, Qazybek, Tóle bas qosa otyrǵan sáýletti eskertkish ornatylypty. Kósheleri de tap-tuinaqtai, qazaq danalarynyń esimimen atalady.
Árine astanamyzdyń bolashaǵy kóbinese 21 ǵasyrdaǵy halyqaralyq, ekonomikalyq, geosaiasi jáne basqa qatynastardyń damýyna bailanysty bolary anyq. Astanany saldyryp jatqan Nursultan Nazarbaev bir ǵana qazaq halqynyń emes, birde Uly Dala, birde Tyń nemese Qazaq KSR-i dep ár kezde árqalai atalǵan, al búgin Qazaqstan Respýblikasy atalatyn baitaq óńirdi bir kezde meken etken jáne búgingi tańda mekendep jatqan halyqtardyń «eýraziialyq armanyn» asqaqtatýǵa bekem bel bailap otyr. Bul ólke-halyqtardy baýyryna basyp, tatýlastyryp qana qoimai, olardy jańa qaýymdastyq, jańa órkeniet qurý jolynda toptastyra bilgen ólke.
Elordanyń órkendeýi elimizdiń órkendeýiniń belgisi. Endeshe bas qalanyń jańadan qalanyp jatqan irgetasynyń berik bolýy da memleketimizdiń bolashaqqa nyq senimmen jasar qadamynyń naǵyz kepiline ainalmaq. Keler urpaqtyń da, jastardyń da bolashaǵy bir ózińde! Al seniń gúldenýiń solardyń qolynda. Keleshegiń jarqyn bolsyn, halqymnyń aq ordasy, kórkeiip, biikterden kórine bergeisiń!
