«Elimai» klýbynyń fýtbolshysy ári «Skaýt» balalar komandasynyń bapkeri Ilia Býrtovoi jol apatynan keiin aýrýhanada kóz jumdy. Ol 29 jasta bolǵan, dep habarlaidy dalanews.kz.
Qaiǵyly oqiǵa Qaraǵandy oblysynda bolǵan. Óńirlik politsiia departamentiniń málimetinshe, jol apaty 6 maýsym kúni Abai – Qaraǵandy tasjolynda, Dýbovka kentine jaqyn mańda tirkelgen.
Aldyn ala derek boiynsha, Chevrolet Cobalt kóligin basqarǵan 21 jastaǵy júrgizýshi rólge ie bola almai, qarsy baǵytqa shyǵyp ketken. Saldarynan kólik 44 jastaǵy azamat tizgindegen Opel Vectra avtokóligimen soqtyǵysqan.
Apattan Chevrolet Cobalt júrgizýshisi men onyń eki jolaýshysy jaraqat alyp, aýrýhanaǵa jetkizildi. Zardap shekkenderdiń biri Ilia Býrtovoi bolǵan. Ol aýyr halde kópbeiindi aýrýhanaǵa jatqyzylǵanymen, dárigerler onyń ómirin saqtap qala almady.
Qaraǵandy oblysynyń politsiia departamenti jol-kólik oqiǵalarynyń negizgi sebepteri qatarynda jyldamdyqty shamadan tys asyrý, qarsy baǵytqa shyǵý jáne róldegi jaýapsyzdyq áli de jii kezdesetinin eskertti.
Tártip saqshylary júrgizýshilerdi jol qozǵalysy erejelerin qatań saqtaýǵa, jyldamdyqty asyrmaýǵa jáne jolda barynsha saq bolýǵa shaqyrdy.
Ilia Býrtovoi fýtboldaǵy mansabyn 2015 jyly «Shahter-Bolat» komandasynda bastaǵan. Keiin qaraǵandylyq «Progress» sapynda fýtzaldan óner kórsetti. Sondai-aq FC BIRLIK áýesqoi klýbynda oinap, komandamen birge shaǵyn fýtboldan álem chempionatyna qatysqan.
2025 jyly ol «Elimai» sapynda Qazaqstan Kýbogy men Birinshi ligada óner kórsetken edi.
