Ózbekstannyń Tashkent oblysynda jas kelinniń jumbaq ólimi qoǵamda qyzý talqylanyp jatyr. Qyz turmysqa shyqqanyna nebári úsh kún bolǵanda qaitys bolǵan, dep habarlaidy dalanews.kz.
Marqumnyń anasy telebaǵdarlamada qyzynyń ólimine qatysty kúdigi baryn aitty. Onyń sózinshe, jalǵyz qyzyn Keles qalasyna uzatqan. Kúieý jigittiń týystary aýqatty otbasy ekenin aityp, qudalyqqa kóndirgen.
"Bul meniń jalǵyz qyzym edi. Kúieýim bolmasa da, barymdy salyp, jaqsy toi jasaǵym keldi. Biraq úsh kúnnen keiin maǵan "Qyzyńnyń súiegin alyp ket" dep habarlady. Mundai sózdi estý óte aýyr", – dedi anasy.
Oqiǵa 6 sáýir kúni keshki ýaqytta bolǵan. Áieldiń aitýynsha, qyzy turmysqa shyqqannan keiin ózin baqytty sezingenin aityp, video arqyly jaqyndaryna qýanyshyn jetkizip júrgen.
"Onyń óz-ózine qol jumsaýy múmkin emes", – deidi marqumnyń anasy.
Al kelinniń enesi bul jaǵdaiǵa eshkimniń qatysy joq ekenin aitty.
"Is jabyldy. Sol kúni úide eshkim bolǵan joq. Túskenine úsh kún bolǵan kelindi óltirý múmkin emes", – dedi ol.
Marqumnyń otbasy mahalla ishinde syily bolǵany, al anasy eki balasyn jalǵyz ózi tárbielep ósirgeni aitylady.
Bas prokýratýra tekserý qorytyndysynan keiin marqumnyń denesinde tunshyǵý belgileri anyqtalmaǵanyn málimdedi. Tergeýge deiingi tekserý barysynda qylmys quramy tabylmaǵandyqtan, qylmystyq is qozǵaýdan bas tartylǵan.
