Elorda kúni qarsańynda «Ǵashyqtar» alleiasynda «Astana saqasy» asyq atý týrniri ótti,- dep habarlaidy Dalanews.kz
Jarysqa eki jas kategoriiasy boiynsha oiynshylar qatysty. Birinshi top boiynsha 12-16 jastaǵy 50 jasóspirim baq synady. Olardyń 30-y er balalar asyq atyp, qalǵan 20-sy qyzdar bes asyq oinap, jarysty.
Ekinshi top boiynsha jarys 17-den joǵary eresekter arasynda ótti. Olar asyq atýdyń «Bes taban» degen túrin oinasa, odan bólek qala turǵyndary arasynda «Beskene», «Jeti asyq» degen túrleri de oinatyldy. Olimpiadalyq júiemen oinalǵan jarysta jeńilgender oiynnan shyǵyp otyrdy. Jarysqa osy oiynnan jattyqtyrýshy bolyp júrgen jáne júlde men ataqtar alǵan 12 tóreshi qazylyq etti.
«Bul – tek jarys, báseke emes. Bul – bizdiń dástúrimiz. Asyq atý – erteden kele jatqan ulttyq oiyndardyń biri. Asyq balanyń kishkentai kezinen júike júiesin durys qalyptastyryp, olardy dáldikke, eptilikke, ustamdylyqqa tárbieleidi. Bul 6 jasar baladan 60-tan asqan aqsaqaldarǵa deiin oinaityn oiyn. Sonyń dáleli retinde búgingi týrnir sońynda qalamyzdyń aqsaqaldary Sovethan jáne Naǵashybek degen aǵalarymyz da asyq atý oiynynyń úlgisin kórsetedi. Jalpy búgingi maqsat qala kúni qarsańynda turǵyndarǵa joǵary kóńil-kúi syilaý», – deidi Asyq atý sportynan aǵa jattyqtyrýshy, Astana qalalyq Asyq atý federatsiiasynyń tóraǵasy Eskendir Rahmetov.
Týrnir jeńimpazdaryna iPad jáne smartfon tartý etildi. Oiyn kezinde asyqtardyń túrleri qoiylǵan kórme uiymdastyryldy. Búginde Astanadaǵy 27 mektepte Asyq atý fakýltativteri tegin jumys isteidi.
