Tótenshe jaǵdailar ministrligi tótenshe jaǵdailardy joiý departamenti basshysynyń orynbasary Aslan Ýakishev Astana – Petropavl tas jolynda 95 kóliktiń soqtyǵysýyna kimderdiń kináli ekenin aitty, dep habarlaidy Dalanews.kz.
Apat saldarynan 20 adam dárigerdiń kómegine júgingen. Mamandardyń aitýynsha, oqiǵaǵa júrgizýshilerdiń tártipsizdigi yqpal etken. Aldyn ala málimet boiynsha, kólikter kolonnamen qozǵalyp bara jatqan kezde, keibir júrgizýshiler qaýipsizdik erejelerin elemei, ózge kólikterdi basyp ozýǵa tyrysqan. Nátijesinde, apatty jaǵdai týyndaǵan.
“IIM qyzmetkerleri kolonnamen júrýdi uiymdastyrǵanymen, júrgizýshilerdiń jaýapsyz áreketi osyndai qaiǵyly oqiǵaǵa alyp keldi. Qazirgi tańda tergeý jumystary júrgizilýde”, – dep atap ótti Ýakishev.
Tótenshe jaǵdailar qyzmeti apat ornynda úilesimdi áreket etip, zardap shekkenderge jedel kómek kórsetken. Qajetti adamdardy jylytý pýnktterine jetkizip, qalaǵa jetýi tiis jolaýshylardy poiyzdarǵa otyrǵyzǵan.
Sondai-aq Aslan Ýakishev júrgizýshilerge joldardyń jabylýy týraly eskertýler men belgilerdi elemeý ákimshilik jaýapkershilikke alyp keletinin eske saldy. Qaýipsizdik erejelerin saqtaý – árbir júrgizýshiniń basty mindeti ekenin erekshe atap ótti.
Eske salaiyq, buǵan deiin "QazAvtoJol" Astana mańyndaǵy tasjolda 95 avtokólik soqtyǵysqany týraly málimdegen edi.
3 qańtarda saǵat 07:20-da aýa raiynyń nasharlaýyna bailanysty respýblikalyq mańyzy bar "Astana-Petropavl" avtojolynyń (18-232 shaqyrym) ýchaskesinde barlyq avtokólik túrleriniń qozǵalysyna shekteý engizildi. Aýa raiy jaqsarǵannan keiin jáne jol tazartylǵan soń, saǵat 12:30-da Shýchinsk qalasy baǵytyna qozǵalys politsiia departamenti qyzmetkerleri men "QazAvtoJol" arnaiy tehnikamen uiymdastyryldy.
Alaida aldyn ala málimetter boiynsha, júrgizýshilerdiń jyldamdyq rejimi men qaýipsiz qashyqtyqty saqtamaýynan saǵat 13:28-de joldyń 153-shaqyrymynda, Janatalap aýyly mańynda shamamen 95 kólik jappai jol apatyna túsken.
Oqiǵa ornynda politsiia qyzmetkerleri men "QazAvtoJol" mamandary jumys istedi. Bir jolaq tazartylyp, jaramdy kólikter qozǵalysyn jalǵastyrǵan edi. Oqiǵa ornynda 22 birikken jol mashinasy jáne 2 traktor jumyldyrylǵan bolatyn.
