Eske sala keteiik, 10 mamyrda Ridderde orman órti órship, qatty jeldiń saldarynan órt jaqyn mańdaǵy úilerge tarady. Órt aýmaǵy 298 gektardy qurady. Onyń 283 gektary – orman aýmaǵy. Órt 59 turǵyn úi ornalasqan bes kósheni qamtydy, 31 úi tolyǵymen órtenip ketti. Bir mezette 80 adam úisiz qaldy. Órt saldarynan bir adam qaza taýyp, eki adam kúiik shalyp, jansaqtaý bóliminde jatyr. Aitarlyqtai materialdyq shyǵyn keltirildi.
El Prezidenti Qasym-Jomart Toqaev órtten zardap shekken Leshoz turǵyndaryna kómek kórsetýdi jáne olardy turǵyn úimen qamtamasyz etýdi tapsyrdy. Nátijesinde zardap shekkenderdiń bir bóligi «Qazmyrysh» JShS qonaq úiine, ekinshi bóligi týystaryna ornalastyryldy. «Qazmyrysh» profilaktoriiine kóshirilgender qurylystyń sońyna deiin tegin turǵyn úimen jáne tamaqpen qamtamasyz etiledi. Budan basqa, kásiporyn bank kartalaryn resimdegennen keiin árbir otbasyna 1 million teńgeden aýdarady.
Aimaq basshysy órt sóndirýshilerdiń qalypty ómirge tez oralýy úshin jedel shara qabyldady. 11 mamyrda arnaiy komissiia turǵyndardyń materialdyq shyǵynyn anyqtaýǵa kiristi.
Oblys ákimi Danial Ahmetov turǵyndarmen kezdesý barysynda joiylǵan úiler qalpyna keltirilmeitinin habarlady. Barlyq zardap shekkender qala ortalyǵyna jaqyn ornalasqan «Botanika» jańa shaǵyn aýdanynda sý qubyry men úi janyndaǵy ýchaskesi bar 80 sharshy metr turǵyn úige tegin ie bolady.
Sondai-aq, jańa aýdannyń infraqurylymdyq jobalarynyń smetalary daiyndaldy. Atap aitqanda jol tósemin jóndeý, elektrmen jabdyqtaý, ortalyq sýmen jabdyqtaý, aýmaqty abattandyrý.
Asqar Mamin zardap shekkenderge arnalǵan úilerdiń qurylys barysyn tekserip, turǵyndarmen kezdesti.
Oblys ákimi tamyz aiynyń sońyna deiin órtten zardap shekkenderdi úimen qamtamasyz etýge ýáde berdi. Qurylysshylar barlyq jumystardy merziminde aiaqtaitynyna senimdi.
