Eske sala keteıik, 10 mamyrda Rıdderde orman órti órship, qatty jeldiń saldarynan órt jaqyn mańdaǵy úılerge tarady. Órt aýmaǵy 298 gektardy qurady. Onyń 283 gektary – orman aýmaǵy. Órt 59 turǵyn úı ornalasqan bes kósheni qamtydy, 31 úı tolyǵymen órtenip ketti. Bir mezette 80 adam úısiz qaldy. Órt saldarynan bir adam qaza taýyp, eki adam kúıik shalyp, jansaqtaý bóliminde jatyr. Aıtarlyqtaı materıaldyq shyǵyn keltirildi.
El Prezıdenti Qasym-Jomart Toqaev órtten zardap shekken Leshoz turǵyndaryna kómek kórsetýdi jáne olardy turǵyn úımen qamtamasyz etýdi tapsyrdy. Nátıjesinde zardap shekkenderdiń bir bóligi «Qazmyrysh» JSHS qonaq úıine, ekinshi bóligi týystaryna ornalastyryldy. «Qazmyrysh» profılaktorııine kóshirilgender qurylystyń sońyna deıin tegin turǵyn úımen jáne tamaqpen qamtamasyz etiledi. Budan basqa, kásiporyn bank kartalaryn resimdegennen keıin árbir otbasyna 1 mıllıon teńgeden aýdarady.
Aımaq basshysy órt sóndirýshilerdiń qalypty ómirge tez oralýy úshin jedel shara qabyldady. 11 mamyrda arnaıy komısıa turǵyndardyń materıaldyq shyǵynyn anyqtaýǵa kiristi.
Oblys ákimi Danıal Ahmetov turǵyndarmen kezdesý barysynda joıylǵan úıler qalpyna keltirilmeıtinin habarlady. Barlyq zardap shekkender qala ortalyǵyna jaqyn ornalasqan «Botanıka» jańa shaǵyn aýdanynda sý qubyry men úı janyndaǵy ýchaskesi bar 80 sharshy metr turǵyn úıge tegin ıe bolady.
Turǵyn úı qurylysyna bes kompanıa kirisip, 120-dan astam jumysshy men 28 tehnıka jumyldyryldy. Kásiporyndardyń árqaısysy 6-7 úı salady. Qurylys bastalyp, úılerdiń irgetasy men qabyrǵalary salyndy. Úılerdiń jobalary barlyq normalar men MemST-tardy eskere otyryp daıyndaldy. «Vostokvzryvprom» JSHS kúrdeli qurylys jónindegi dırektory Valerıı Proskýrınniń aıtýynsha, úılerdiń irgetasy fýndamenttik tutas bloktardan jasalǵan. Bul betonnyń erekshe beriktigi men ustalýyn, sondaı-aq, montajdaýdyń joǵary jyldamdyǵyn qamtamasyz etedi. Úılerdiń qabyrǵalary gazobloktan turǵyzylatyn bolady. Valerıı Proskýrın atap ótkendeı, ol Eýropa men Amerıkada turǵyn úı salý úshin bir jyldan astam ýaqyt boıy qoldanylyp keledi. Qurylysshylardyń tańdaýy dál osy materıalǵa aǵashpen salystyrylatyn jylý ótkizgishtiginiń tómen bolýyna baılanysty tústi.
Sondaı-aq, jańa aýdannyń ınfraqurylymdyq jobalarynyń smetalary daıyndaldy. Atap aıtqanda jol tósemin jóndeý, elektrmen jabdyqtaý, ortalyq sýmen jabdyqtaý, aýmaqty abattandyrý.
Asqar Mamın zardap shekkenderge arnalǵan úılerdiń qurylys barysyn tekserip, turǵyndarmen kezdesti.
Oblys ákimi tamyz aıynyń sońyna deıin órtten zardap shekkenderdi úımen qamtamasyz etýge ýáde berdi. Qurylysshylar barlyq jumystardy merziminde aıaqtaıtynyna senimdi.
