Májilis depýtaty Marhabat Jaiymbetov biýdjet qarjysyna qatysty mańyzdy saýal kóterdi, dep habarlaidy Dalanews.kz.
Depýtat premer-ministr Oljas Bektenovke depýtattyq saýal joldady.
"Memleket basshysy joldaýynda: "Biýdjet qarajatynyń árbir teńgesi el igiligine jumsalýy tiis. Iaǵni qarajatty muqiiat oilastyryp jumsaý kerek" dep naqty atap ótti. Alaida Aýditorlyq palatanyń aqparaty biýdjet qarjysy qalaisha esepsiz jumsalyp jatqanyn anyq kórsetip otyr. Máselen kólik salasynyń ózinde bir emes, birneshe mysal muny dáleldeidi", - dedi ol.
Jaiymbetov aldymen "BAKAD" jobasyn tilge tiek etti. Onyń sózinshe, jobanyń smetasy dollardy 575 teńgeden eseptep jasalǵan, al Úkimettiń resmi baǵamy - 540 teńge.
"Osy aiyrmashylyqtyń ózi-aq 2 milliard teńgeniń artyq shyǵynyna ákelip otyr. Budan biz qarajatty uqypsyz josparlaýdyń kórinisin kórip otyrmyz", - dedi ol.
Depýtattyń pikirinshe, "Jolaýshylar tasymaly" aktsionerlik qoǵamyna bólinetin qarjy da kúmándi.
"Jyl saiyn 8 milliard teńge sýbsidiia qarastyrylǵan. Biraq lizing sharttary bekitilmegen. Quqyqtyq turǵydan da, qarjylyq tártip turǵysynan da qujaty joq jobany qarjylandyrýdyń qisyny joq", - dedi ol.
Sonymen qatar, shekaradaǵy ótkizý beketterine 2021 jyldan beri mol qarjy bólingen.
"Biraq jumys áli tolyq aiaqtalǵan joq, biýdjetten qaita-qaita qosymsha qarajat suralyp otyr. Nátijesinde 8 jobanyń 6-yna artyq shyǵyn kólemi 26 milliard teńgege jetken. Bul degenimiz memleket qarjysyna jasalǵan salǵyrttyqtyń aiǵaǵy. Al Qazaqstan - Qyrǵyzstan shekarasyndaǵy "Qarasý" beketine qosymsha 6,9 milliard teńge suralyp otyr. Biraq ol boiynsha saraptama qorytyndysy da, jer ýchaskesine quqyqtyq qujattar da joq. Mundai jaǵdaida qarjy bólý - ashyq talan-tarajǵa jol ashqanmen teń", - dedi Jaiymbetov.
Depýtattyń sózinshe, biýdjet qarjysy kúmándi jobalarǵa emes, eldiń turmysyn túzeýge baǵyttalǵany jón.
