Qazaqstandyq shahmatshy Bibisara Asaýbaeva Sport ministrliginiń resmi jaýabyna pikir bildirip, shahmattyń «basym emes sport túrleri» qataryna jatqyzylǵanyna narazylyq tanytty, dep habarlaidy dalanews.kz.
Onyń aitýynsha, ministrliktiń «shahmat basym sport túrlerine jatpaidy» degen jaýabyn birneshe ret qaita oqýǵa týra kelgen.
«Jýyrda ǵana Qazaqstan prezidenti Qasym-Jomart Toqaev eldiń strategiialyq baǵytyn aiqyndap, “Kúshti ult kúshti intellektiden bastalady. XXI ǵasyrda basty resýrs – shikizat emes, bilim” degen edi. Álemniń jetekshi elderinde shahmat jai ǵana sport emes. Bul – strategiialyq oilaý, intellektýaldyq kapital jáne memlekettiń básekege qabilettiliginiń simvoldarynyń biri», – dep jazdy shahmatshy.
Bibisara Asaýbaeva eger shahmat shynymen de basym baǵyttardyń qataryna kirmese, onda memleket tarapynan kórsetilgen joǵary marapattardyń máni qandai degen saýal qoidy.
«Eger shahmat basymdyqqa ie bolmasa, onda prezident meni II jáne III dárejeli “Barys” ordenderimen qandai eńbegim úshin marapattady?» – deidi ol.
Shahmatshy qazirgi tańda álemdik reitingte besinshi orynda turǵanyn atap ótti. Onyń pikirinshe, ministrliktiń jaýabynan shyǵatyn qorytyndy – eldiń intellektýaldyq bolashaǵyna sheneýnikterden buryn ata-anasy investitsiia salǵan.
«Meniń ata-anam ǵana emes, dál osyndai joldy tańdaǵan myńdaǵan otbasy Qazaqstannyń intellektýaldyq bolashaǵyna úles qosyp jatyr», – degen oi aitty sportshy.
Asaýbaevanyń sózinshe, Qazaqstannyń bolashaǵy intellektimen, bilimmen, ǵylymmen jáne adami kapitaldyń sapasymen aiqyndalady.
Ol sondai-aq Sport ministrliginiń ustanymy prezident belgilegen baǵytqa qanshalyqty sáikes keletini týraly másele kóterdi.
«Shahmatqa degen kózqaras – intellektige degen kózqaras. Al intellektige degen kózqaras – eldiń bolashaǵyna degen kózqaras. Sirá, Sport ministri basqa baǵytty ustanatyn siiaqty», – dep túiindedi Bibisara Asaýbaeva.
Eske salaiyq, shahmattan úsh dúrkin álem chempiony Bibisara Asaýbaevanyń jalaqysynyń qysqarýy zańnamaǵa jaqynda engizilgen ózgeristerge bailanysty ekenin Týrizm jáne sport ministrligi málimdedi. Salalyq vedomstvo tanymal sportshynyń úndeýine jaýap bergen.
Ózgeristerge sáikes, shahmat aldaǵy Aziia oiyndarynyń baǵdarlamasyna enbegendikten, basym sport túrleri qatarynan shyǵarylǵan. Memlekettik organnyń málimetinshe, sońǵy úsh jylda Bibisara Asaýbaevany federatsiia, ministrlik jáne vedomstvoǵa qarasty uiymdar tarapynan qarjylandyrý kólemi shamamen 700 million teńgeni quraǵan. Sonymen qatar Qazaqstan shahmat federatsiiasy oǵan arnalǵan jeke syiaqy júiesin qarastyrǵan.
Halyqaralyq grossmeister videoúndeýinde jalaqysynyń úsh esege qysqarǵanyn, al jarystarǵa daiyndyq shyǵyndarynyń bir bóligin óz qarajaty jáne ata-anasynyń kómegi arqyly óteýge májbúr ekenin aitqan bolatyn. Sondai-aq Bibisara Asaýbaeva ótken jyldyń sońynda Prezident jarlyǵymen marapattalǵan II dárejeli «Barys» ordenin áli kúnge deiin almaǵanyn málimdedi.
