Halyq ártisi Asanáli Áshimov bastaǵan óner salasynyń maitalmandary úzeńgilesterine ádeii or qazyp, osy jaǵdaidy uiymdastyrǵan adamdardyń sot aldynda jaýap berýin talap etti, – dep habarlaidy KTK arnasy.
Esterińizge salsaq, Áýezov teatrynyń direktory birneshe kún buryn 1 jarym million teńge para alý kezinde ustalǵan bolatyn.
Ol kinásyn birden moiyndaǵandyqtan, tergeý aiaqtalǵansha bostandyqta júrmek.
Ákem teatrdyń sahnasy búgin kúrsiniske toldy. Jinalǵan ártister qaýymynyń janarlary solǵyn tartqan. Úzeńgilesteri Erlan Biláldiń basyna túsken jaǵdai olardyń da qabyrǵasyn qaiystyrǵandai. Múiizi qaraǵaidai Asanáli Áshimov bastaǵan, Nurlan Orazalinder qostaǵan ziialylar arasha surap, aǵynan jaryldy. «Qulagerdi» súrindirgen Batyrashty el bilýi tiis ekenin aitty.
– Osyny uiymdastyrǵan adamdy sotqa shaqyramyn. Biz Japoniiaǵa ketkende, kollektiv demalyp jatqanda teatrdyń ishine apparatýra ornatqan. Aýyryp jatqan jerinen shaqyrtyp osyndai jaǵdaiǵa dýshar qylǵan, – dedi Qazaqstan teatrlar qaýymdastyǵynyń prezidenti Asanaáli Áshimov.
Qańtardaǵy «Erlan paramen ustaldy» degen habar demde ot tigen qaýdai lap etti. Quzǵynǵa jinalǵan qarǵadai, ony qaralaǵandar da qaptady. Ósekten ózekteri órtengen óner ókilderi Erlannyń bir qateligi úshin tunǵan talantyn taptap, tunshyqtyrýǵa bolmaitynyn, direktorlyq taǵynan taiǵanmen, ártistik arǵymaǵynan túspeýi kerek ekenin aitady.
– Erlan taza qalpy, óziniń aq kóilek bolmysymen, sengishtigimen kelip osy jaisyz jaǵdaidyń qurbany bolyp otyrǵany sekildi . Tarihtan bilemiz Motsart pen Saleridiń qalai bolǵanyn. Demek aramyzda Seleriler áli bar. Olar eń qiyn áreketke baryp otyr, – deidi Qazaqstan Jazýshylar odaǵynyń basqarma tóraǵasy Nurlan Orazalin.
Erlannyń áriptesteri onyń adamdyǵyn aityp aqtap, emirene, kózderine jas alyp egildi.
Jalǵandy jalpaǵynan basqandar,
Ar-abyroidan asqandar,
Bári de seniń oǵylanyn, bári de.
Tabala meili, tala meili,
Talyp jyǵylǵan tulǵannyń tabanyna
Aq bataly alaqanyndy tóse meili,
Ol seniki qazaq!
