حالىق ءارتىسى ءاسانالى ءاشىموۆ باستاعان ونەر سالاسىنىڭ مايتالماندارى ۇزەڭگىلەستەرىنە ادەيى ور قازىپ، وسى جاعدايدى ۇيىمداستىرعان ادامداردىڭ سوت الدىندا جاۋاپ بەرۋىن تالاپ ەتتى، – دەپ حابارلايدى كتك ارناسى.
ەستەرىڭىزگە سالساق، اۋەزوۆ تەاترىنىڭ ديرەكتورى بىرنەشە كۇن بۇرىن 1 جارىم ميلليون تەڭگە پارا الۋ كەزىندە ۇستالعان بولاتىن.
ول كىناسىن بىردەن مويىنداعاندىقتان، تەرگەۋ اياقتالعانشا بوستاندىقتا جۇرمەك.
اكەم تەاتردىڭ ساحناسى بۇگىن كۇرسىنىسكە تولدى. جينالعان ارتىستەر قاۋىمىنىڭ جانارلارى سولعىن تارتقان. ۇزەڭگىلەستەرى ەرلان ءبىلالدىڭ باسىنا تۇسكەن جاعداي ولاردىڭ دا قابىرعاسىن قايىستىرعانداي. ءمۇيىزى قاراعايداي ءاسانالى ءاشىموۆ باستاعان، نۇرلان ورازاليندەر قوستاعان زيالىلار اراشا سۇراپ، اعىنان جارىلدى. «قۇلاگەردى» سۇرىندىرگەن باتىراشتى ەل ءبىلۋى ءتيىس ەكەنىن ايتتى.
– وسىنى ۇيىمداستىرعان ادامدى سوتقا شاقىرامىن. ءبىز جاپونياعا كەتكەندە، كوللەكتيۆ دەمالىپ جاتقاندا تەاتردىڭ ىشىنە اپپاراتۋرا ورناتقان. اۋىرىپ جاتقان جەرىنەن شاقىرتىپ وسىنداي جاعدايعا دۋشار قىلعان، – دەدى قازاقستان تەاترلار قاۋىمداستىعىنىڭ پرەزيدەنتى ءاساناالى ءاشىموۆ.
قاڭتارداعى «ەرلان پارامەن ۇستالدى» دەگەن حابار دەمدە وت تيگەن قاۋداي لاپ ەتتى. قۇزعىنعا جينالعان قارعاداي، ونى قارالاعاندار دا قاپتادى. وسەكتەن وزەكتەرى ورتەنگەن ونەر وكىلدەرى ەرلاننىڭ ءبىر قاتەلىگى ءۇشىن تۇنعان تالانتىن تاپتاپ، تۇنشىقتىرۋعا بولمايتىنىن، ديرەكتورلىق تاعىنان تايعانمەن، ارتىستىك ارعىماعىنان تۇسپەۋى كەرەك ەكەنىن ايتادى.
– ەرلان تازا قالپى، ءوزىنىڭ اق كويلەك بولمىسىمەن، سەنگىشتىگىمەن كەلىپ وسى جايسىز جاعدايدىڭ قۇربانى بولىپ وتىرعانى سەكىلدى . تاريحتان بىلەمىز موسارت پەن سالەريدىڭ قالاي بولعانىن. دەمەك ارامىزدا سەلەريلەر ءالى بار. ولار ەڭ قيىن ارەكەتكە بارىپ وتىر، – دەيدى قازاقستان جازۋشىلار وداعىنىڭ باسقارما ءتوراعاسى نۇرلان ورازالين.
ەرلاننىڭ ارىپتەستەرى ونىڭ ادامدىعىن ايتىپ اقتاپ، ەمىرەنە، كوزدەرىنە جاس الىپ ەگىلدى.
جالعاندى جالپاعىنان باسقاندار،
ار-ابىرويدان اسقاندار،
ءبارى دە سەنىڭ وعىلانىن، ءبارى دە.
تابالا مەيلى، تالا مەيلى،
تالىپ جىعىلعان تۇلعاننىڭ تابانىنا
اق باتالى الاقانىندى توسە مەيلى،
ول سەنىكى قازاق!
