«ART forým»: Almaty oblysynda sheberlik saǵaty ótti
Bundai shara oblys ortalyǵynda birinshi ret ótkizilip otyrǵan joq. Buǵan deiin «Jetisy-creative days» festivali ótken edi. Onda 5 túrli shyǵarmashylyq saladaǵy kil myqtylar jinalyp, óz tájiribelerimen bólisti. «ART forým» osynyń jalǵasy desek artyq aitqandyq emes.
Forým, tek sheberlik saǵatymen shektelgen joq. Onda kelgen sýretshi, fotograf, mýralshylardyń týyndylary kópshilik nazaryna shaǵyn kórme aiasynda usynyldy. Bul da kreativti kózqarastaǵy tulǵalardyń tanym kókjiegin keńeitýge baǵyttalǵan jumystarynyń biregeii.
Sýret salý óneri «ekiniń biri, egizdiń syńaryna» berile bermeitin asa kerim dúnie. Onyń san túrli iirimin igerý kez kelgenniń qolynan kele bermeidi. Áitsede, sulý ónerdi ómiriniń órnegine ainaldyrǵandarda bar. Erekshe qoltańbasy men qaitalanbas qabiletiniń arqasynda daralanǵan darabozdar forýmda tóbe kórsetti. Bul qatarda, Eýraziia jáne Qazaqstan dizainerler odaǵynyń múshesi, Qazaqstan Sýretshiler odaǵynyń múshesi, T.Júrgenov atyndaǵy Qazaq ulttyq akademiiasynyń Sándik qoldanbaly óner kafedrasynyń oqytýshysy Baýyrjan Dosjanov, Qazaqstan Respýblikasy Sýretshiler odaǵynyń múshesi, túrli sýret kórmeleriniń avtory Móldir Saǵyndyqova men Júrgenov atyndaǵy Qazaq ulttyq óner akademiiasynyń oqytýshysy, Qazaqstan Sýretshiler odaǵynyń múshesi Dáýrenbek Beknazarov jáne Gray ONE Graffiti sýretshisi Sergei Nagornyhtar bar.
Forýmǵa qatysýshy sheberler túrli taqyryptaǵy týyndylardy qas-qaǵym sátte beinelep,tańdai qaqtyryp, eldiń súiispenshiligine bólendi.
Solardyń ishinde, zamanaýi kiiz basý tehnologiialarynyń panelderi negizinde «Oshaǵyń sónbesin» atty týyndyny basa aitqan abzal. Túrli-tústi kiizdiń kómegimen jasalǵan keskindeme kózdiń jaýyn alady. Munda, qazaqqa tán bolmys, otbasyndaǵy qundylyq beinelengen. Shyǵarmanyń aty zatyna sai. Tamashalýshy jandy tamsandyratyn ádemiliktiń avtory-Baýyrjan Dosjanov. Onyń aitýynsha, kiizden sýret salý asqan yjdahattylyqty talap etedi.
«Kiiz basýdy kezinde ájelerimizden kórip óstik. Bir qaraǵan kózge óte jeńil kóringenimen ony jasaýdyń ózi úlken protsess. Búginde tehnologiia damyǵan. Qoldan júndi tútýdiń qajeti shamaly. Daiyn shikizatty alyp, ony qalaýymyzsha tústerge boiap, kóńilimizge jatqan sulbany shyǵarýǵa tyrysamyz. Búgingi forýmǵa tańdaǵan taqyrybym «Oshaǵyń sónbesin» dep atalady. Munda qarapaiym ǵana tabiǵat pen qazaqtyń kiiz úiin beineledim. Osy arqyly jylýlyq, tútini túzý shyqqan otbasynda ekenin kórsetkim keldi. Mendik túisik osyǵan saiady»,-deidi Baýyrjan Táttibekuly.
Forýmǵa kelýshilerdiń janaryn jaýlaǵan taǵy bir sýrettiń salý ádisi tym erekshe boldy. Graffiti sýretshi Sergei Vasilevich Arton iaǵni sýret salýǵa arnalǵan boiaýdyń kómegimen Santa-Klaýsty beinelep shyqty. Qylqalammen jumys jasaýdyń ózi eptilikti qajet etetin eskersek, ballondy qoldaný arqyly aýqymdy týyndyny shyǵarý ońai emes. Sondai-aq, Dáýrenbek Beknazarov pen Móldir Saǵyndyqovanyńda jumystary eldiń kóńilinen shyqty. Shyǵarmashylyq tulǵaǵa serpilis syilaǵan forýmǵa kelýshiler syrbaz ónerdiń syryna qanyǵyp, tereńine boilap tarqasty.
